loader
Foto

‘नासा’कडून विशेष व्हेंटिलेटर विकसित...

वॉशिंग्टन: खास 'कोव्हिड १९'च्या रुग्णांसाठी अमेरिकी अवकाश संशोधन संस्थेने (नासा) विशेष उच्च दाबयुक्त व्हेंटिलेटर तयार केला आहे. व्हेंटिलेटर इंटरव्हेन्शन टेक्नॉलॉजी अॅक्सेसिबल लोकली (व्हायटल) असे नाव या यंत्राला देण्यात आले आहे, अशी माहिती 'नासा'च्या वतीने देण्यात आली.

ज्या रुग्णांना सौम्य लक्षणे आहेत, अशांसाठी हे उपकरण विकसित करण्यात आले आहे, जेणेकरून गंभीर रुग्णांना हॉस्पिटलमधील अधिकाधिक व्हेंटिलेटर उपलब्ध व्हावेत, असे 'नासा'ने निवेदनात स्पष्ट केले आहे.

गेल्या आठवड्यात या उपकरणाची वैद्यकीय चाचणी न्यूयॉर्कमधील इकान स्कूल ऑफ मेडिसिनमध्ये करण्यात आली असून, ती यशस्वी ठरली आहे, असेही निवेदनात म्हटले आहे.
 

हे यंत्र हॉस्पिटलमधील नेहमी वापरण्यात येत असलेल्या व्हेंटिलेटरला पर्याय नाही, मात्र ज्यांना सौम्य लक्षणे आहेत आणि नेहमीचे व्हेंटिलेटर नसले तरी चालू शकते, अशांसाठीच हे यंत्र आहे. नेहमीच्या व्हेंटिलेटरचे आयुर्मान चार-पाच वर्षे असते. मात्र, 'नासा'चा व्हेंटिलेटर चार महिन्यांपुरताच काम करेल. या व्हेंटिलेटरसाठीही रुग्णाला बेशुद्ध करूनच नाकात नळ्या घालाव्या लागणार आहेत.

या उपकरणाच्या व्यावसायिक उत्पादनाला परवानगी मिळण्याची प्रतीक्षा 'नासा'ला आहे. आपत्कालीन स्थितीत अशी परवानगी तातडीने मिळू शकते, असे संस्थेच्या निवेदनात म्हटले आहे.

Recent Posts