loader
Foto

चीन-रशियाकडून अंतराळमध्ये युद्ध?; जपानच्या उपग्रहाजवळ सॅटेलाइट किलर

टोकियो: संपूर्ण जग करोनाशी दोन हात करत असताना चीनच्या कुरापती सुरू आहेत. आक्रमक विस्तारवादी धोरणांमुळे शेजारील देशांसोबत चीनचे संबंध तणावपूर्ण झाले आहेत. त्यातच आता चीन आणि रशिया एकत्रितपणे अंतराळात युद्ध सुरू करण्याच्या तयारीत असल्याचा आरोप करण्यात येत आहे. जपानच्या एका उपग्रहाजवळ चीन आणि रशियाचे किलर सॅटेलाइट दिसले. त्यामुळे जपानच्या अधिकाऱ्यांनी याबाबत चिंता व्यक्त केली आहे.

जपानच्या अधिकाऱ्यांनी दिलेल्या माहितीनुसार, चीन आणि रशियाचे सॅटेलाइट्स जपानच्या लष्करी सॅटेलाइटच्या जवळ आले आहेत. त्याबाबत जपानने अमेरिकेला माहिती दिली आहे. चीन आणि रशियाच्या सॅटेलाइट्च्या हालचालींवर लक्ष ठेवण्यासाठी जपानकडे यंत्रणा नसल्यामुळे अमेरिकेची मदत घेण्यात येत आहे. या सॅटेलाइट्सच्या मदतीने जपान गुप्त माहिती मिळवते.

जपानमधील वृत्तपत्र योमीरीने म्हटले की, या वर्षाच्या सुरुवातीला अमेरिकन टोही सॅटेलाइटजवळ रशियाचे कॉस्मोस २५४२ हे उपग्रह पोहचले होते. त्यानंतर अमेरिकेने धोक्याचा इशारा जारी केला होता. रशियन किलर सॅटेलाइट अमेरिकन उपग्रहाच्या खूपच जवळ होता. रशियन उपग्रह अमेरिकन उपग्रहाच्या फोटोग्राफीक डिटेल्सही घेऊ शकत होता.

 

रशियन उपग्रह अंतराळांमध्ये शत्रू देशाच्या उपग्रहाला निष्क्रिय अथवा नष्ट करण्याचा सराव अभ्यास करत असल्याचे अमेरिकेने म्हटले होते. अमेरिकेत जगातील सर्वाधिक गुप्तहेर उपग्रह आहेत. या उपग्रहांच्या मदतीने अमेरिका इतर देशातील गुप्त माहिती आणि हालचालींवर लक्ष ठेवते. यापैकी काही उपग्रहांना रशिया अथवा चीनने नष्ट केल्यास युद्धजन्य परिस्थितीत अमेरिकेचे मोठे नुकसान होऊ शकते.

चीनकडेही अंतराळात मारा करण्याची क्षमता आहे. जमिनीतून हवेत डागता येणारे अॅण्टी सॅटेलाइट मिसाइल आणि लेझर गन चीनने विकसित केले आहेत. वेळप्रसंगी चीन अमेरिकेच्या उपग्रहांना लक्ष्य करू शकते.

भारताकडेदेखील अॅण्टी सॅटेलाइट मिसाइल आहेत. मार्च २०१९ मध्ये भारताने याची चाचणी घेत एका निष्क्रिय उपग्रहाचा वेध घेतला होता.

Recent Posts