loader
Foto

'या' जीवनसत्वामुळे करोनापासून होतोय बचाव!

लंडन: करोनाच्या संसर्गाने जगभरात धुमाकूळ घातला आहे. काही देशांमध्ये करोनाच्या संसर्गाने हाहाकार माजवला असून काही देशांमध्ये करोनावर नियंत्रण मिळवण्यास यश आले आहे. करोनाच्या संसर्गाला अटकाव करण्यासाठी अनेक देशांनी विविध उपाययोजना आखल्या त्यात काहींना यशही आले. त्यातच आता, करोनाचा आजार दूर ठेवण्यास आणि बाधा झाल्यास मृत्यूचा धोका कमी करण्यास एका जीवनसत्त्वाने महत्त्वाची भूमिका बजावली असल्याचे शास्त्रज्ञांनी म्हटले आहे.

एका आयरिश वैद्यकीय नियतकालिकेत प्रकाशित झालेल्या अहवालानुसार, ज्या देशांतील नागरिकांच्या शरीरात 'ड' जीवनसत्त्वाचे प्रमाण अधिक आहे, त्या देशांमध्ये करोना संसर्गाचा दर कमी असून मृत्यूही कमी झाले असल्याचे म्हटले आहे. त्याशिवाय, ज्या देशांमध्ये करोनाच्या संसर्गाने थैमान घातले आहे, त्या देशांमधील नागरिकांमध्ये 'ड' जीवनसत्वाची कमतरता आढळत असल्याचे नमूद करण्यात आले आहे. नॉर्वे, डेन्मार्क, फिनलँड, स्नीडन या देशांमधील नागरिकांसाठी 'ड' जीवनसत्त्व सुरक्षा कवच झाले आहे. 'ड' जीवनसत्त्वामुळे करोनाच्या संसर्गाचा फैलाव कमी झाला असून आजारी पडणाऱ्या लोकांची संख्या कमी आहे. त्याशिवाय या देशांमध्ये मृतांचा दरही कमी आहे.

या अहवालानुसार, स्पेन, फ्रान्स, इटली, ब्रिटनशिवाय अमेरिका, भारत आणि चीन या देशातील नागरिकांमध्ये 'ड' जीवनसत्त्वाची कमतरता आढळते. त्यामुळेच या देशातील नागरिकांमध्ये करोनाशी दोन हात करण्याची क्षमता कमी आहे. त्यामुळे या देशांमध्ये करोनाबाधितांची संख्या आणि मृतांची संख्या लक्षणीय आहे. शास्त्रज्ञांनी या युरोपीयन देशांतील नागरिकांच्या शरीरातील 'ड' जीवनसत्त्वाचा अभ्यास करण्यासाठी १९९९ पासूनच्या माहितीचा अभ्यास केला. करोनामुळे प्रभावित झालेल्या देशांमधील नागरिकांच्या शरीरात 'ड' जीवनसत्त्वाचे प्रमाण घटत असल्याचे समोर आले.

'ड' जीवनसत्त्वाची कमतरता सर्वाधिक आशियाई आणि कृष्णवर्णीय नागरिकांमध्ये आढळून आली. ब्रिटन आणि अमेरिकेत मृत पावणाऱ्यांमध्ये या नागरिकांची मोठी संख्या आहे. नॉर्वे, फिनलँड आणि स्वीडनच्या भौगोलिक स्थितीमुळे सूर्य प्रकाश फार कमी असतो. त्यामुळे 'ड' जीवनसत्त्व मिळत नाही. त्यामुळे या देशातील नागरीक 'ड' जीवनसत्त्वासाठी दुग्धजन्य पदार्थांचे अधिक सेवन करतात.

दरम्यान, जगभरात करोनाबाधितांच्या संख्येने दीड कोटींचा टप्पा ओलांडला आहे. तर, सहा लाख २१ हजारजणांचा मृत्यू झाला आहे. अमेरिकेत करोनाचा सर्वाधिक संसर्ग फैलावला असून आतापर्यंत ३९ लाख करोनाबाधित आढळले असून एक लाख ४० हजार जणांचा मृ्त्यू झाला आहे. अमेरिकेनंतर ब्राझील आणि भारतात सर्वाधिक करोनाबाधित आढळले आहेत.

Recent Posts