loader
Foto

Coronavirus फेसशिल्ड घालून सलूनमध्ये जाताय...मग हे वाचा

लंडन: जगभरात करोनाचा संसर्ग वेगाने फैलावत आहे. जवळपास २०० देशांमध्ये दीड कोटीहून अधिकजणांना करोनाची बाधा झाली आहे. करोनाच्या संसर्गाला अटकाव करण्यासाठी लशींवर संशोधन सुरू करोनाच्या विषाणूंचा अभ्यास सुरू आहे. आता आणखी एक नवीन बाब समोर आली आहे. बऱ्याच दिवसांच्या कालावधीनंतर सलून पुन्हा सुरू झाले असून करोनाच्या बचावापासून फेसशिल्डचा अनेकजण वापर करत आहेत. मात्र, फेसशिल्डच्या वापरानंतरही करोनाची बाधा होत असल्याचे समोर आले आहे.

स्विर्त्झलंडमधील आरोग्य तज्ञांनी केलेल्या अभ्यासानंतर हा दावा करण्यात आला आहे. स्विर्त्झलंडमधील एका गावात करोनाबाधितांची संख्या अचानक वाढली. त्यानंतर एक हॉटेलमधून हा संसर्ग फैलावला असल्याचे समोर आले. या हॉटेलमध्ये सर्व प्रकारची खबरदारी घेण्यात आल्यानंतरही करोना फैलावला असल्यामुळे त्याचा तपास सुरू करण्यात आला. तज्ञांनी केलेल्या पाहणीनुसार, फक्त फेसशिल्ड घातलेल्या नागरिकांना करोनाची बाधा झाली असल्याचे समोर आले. तर, दुसरीकडे ज्यांनी मास्क किंवा फेसशिल्ड व मास्कचा वापर केला, त्यांना करोनाची बाधा झाली नसल्याचेही तज्ञांना आढळले. जगभरातील सलून चालकांना, हेअर स्टाइलिशांना करोनापासून वाचण्यासाठी काही सूचना देण्यात आल्या आहेत. काही ठिकाणी हेअर स्टाइलिश लोकांना करोनाच्या बचावापासून फेसशिल्डचा वापर करण्याचे सांगितले आहे.

तज्ञांनी दिलेल्या माहितीनुसार, फक्त फेसशिल्डच्या वापरामुळे करोनाला अटकाव करता येणार नाही. फक्त फेसशिल्डचा वापर केल्यास तोंडावाटेही करोनाचा विषाणू शरीरात जाण्याचा धोका आहे. त्यामुळे मास्कचा वापर करण्याचा सल्ला तज्ञांनी दिला आहे. जगभरात करोनाबाधितांच्या संख्येने दीड कोटींचा टप्पा ओलांडला आहे. तर, सहा लाख २१ हजारजणांचा मृत्यू झाला आहे. अमेरिकेत करोनाचा सर्वाधिक संसर्ग फैलावला असून आतापर्यंत ३९ लाख करोनाबाधित आढळले असून एक लाख ४० हजार जणांचा मृ्त्यू झाला आहे. अमेरिकेनंतर ब्राझील आणि भारतात सर्वाधिक करोनाबाधित आढळले आहेत. ब्राझीलमध्ये करोनाबाधितांची संख्या २२ लाखांहून अधिक झाली असून ८२ हजार नागरिकांना प्राण गमवावे लागले आहे. तर, भारतात १२ लाखाच्या जवळपास करोनाबाधितांची संख्या आहे. रशियात सात लाख ८७ हजार जणांना करोनाची बाधा झाली आहे.

Recent Posts