loader
Foto

ukraine bus hostage एका चित्रपटासाठी त्याने केले बसचे अपहरण!

किव: खंडणी, तुरुंगातून गुन्हेगाराची सुटका, शत्रू देशाविरोधात कारवाई आदी वेगवेगळ्या कारणांसाठी बस, विमानांचे अपहरण करण्यात आल्याच्या घटना घडल्या आहेत. मात्र, युक्रेनमध्ये एकाने बसचे अपहरण करत अनेकांना ओलीस ठेवले होते. या ओलीस नाट्याचा शेवटही एखाद्या चित्रपटाला साजेशा असा झाला. ज्या कारणासाठी बसचे अपहरण करण्यात आले ते कारण ऐकून अधिकारीही चक्रावून गेले.

युक्रेनमधील लुट्स्क शहरात सोमवारी एका बसचे अपहरण करण्यात आले. बसमध्ये १० पेक्षा अधिक प्रवासी होते. बसचे अपहरण झाल्यानंतर सुरक्षा यंत्रणांनी ताबडतोब हालचाली केल्या. अपहरणकर्त्याने एकाही प्रवाशाला ठार केले नाही. त्यामुळे अधिकाऱ्यांकडून अपहरणकर्त्याशी चर्चा सुरू होती. अपहरण करणाऱ्याने राष्ट्रपतींसोबत चर्चा करण्याची मागणी केली. त्याच दरम्यान इतर अधिकाऱ्यांनीही या अपहरणकर्त्यासोबत चर्चा सुरू ठेवली होती. अखेर त्याने बसमधील जखमी प्रवासी आणि गर्भवती महिलांची सुटका केली. त्यानंतर त्याने राष्ट्रपतींनी एक व्हिडिओ संदेश देण्याची मागणी केली.

अपहरणकर्त्याच्या या मागणीमुळे सगळेच जण चक्रावले. एका महत्त्वाच्या बैठकीत असलेले राष्ट्रपती सातत्याने सुरक्षा अधिकाऱ्यांच्या संपर्कात होते. अपहरणकर्त्याने केलेली मागणी अस्पष्ट होती. त्यामुळे घटनास्थळी काय सुरू आहे, हे समजून घेण्यास वेळ लागला असल्याचे त्यांनी सांगितले. अपहरणकर्त्यांने राष्ट्रपतींनी एक व्हिडिओ शेअर करण्याची मागणी केली. वर्ष २००५ मध्ये प्रदर्शित झालेला 'अर्थलिंग्स' हा चित्रपट सर्वांनी पाहण्याचे आवाहन राष्ट्रपतींनी व्हिडिओद्वारे केले. राष्ट्रपतींच्या या व्हिडिओ आवाहनानंतर अपहरणकर्त्याने बसमधील सर्वच प्रवाशांची सुटका केली आणि जवळपास १० तासांहून अधिक काळ सुरू असलेल्या ओलीस नाट्यावर पडदा पडला.

हॉलिवूड स्टार जोआकिन फोनिक्सच्या 'अर्थलिंग्स' या चित्रपटात प्राण्यांच्या अधिकारांबाबत भाष्य करण्यात आले आहे. या चित्रपटाला काही पुरस्कारही मिळाले आहेत. फक्त एक चित्रपट पाहण्याचे आवाहन राष्ट्रपतींनी करावे, यासाठी बस अपहरण करण्यात आल्यामुळे या प्रकरणाची चर्चा सुरू आहे.

अपहरणकर्त्याला पोलिसांनी अटक केली असून त्याला तुरुंगात डांबण्यात आले आहे. मकयस्म क्रयवोश (वय ४४) असे त्याचे नाव आहे. या आरोपीने याआधीदेखील १० वर्षाच्या तुरुंगवासाची शिक्षा भोगली आहे. आता बस अपहरण प्रकरणी आरोपीला मोठी शिक्षा होण्याची दाट शक्यता आहे. सध्या पोलिसांकडून आरोपीची चौकशी सुरू असून दहशतवादी संघटनेची काही संबंध आहे का, याचीही चौकशी करण्यात येणार आहे.

Recent Posts