loader
Foto

धक्कादायक! 'या' देशातल्या रस्त्यांवर मृतदेहांचा खच, करोनाबाधितांची संख्या अधिक

सुक्रह: जगभरात करोनाच्या संसर्गाने धुमाकूळ घातला आहे. जवळपास २०० देशांतील सुमारे दीड कोटी नागरिकांना करोनाची बाधा झाली आहे. अनेक देशांमधील आरोग्य व्यवस्था करोनाच्या उद्रेकाने कोलमडून पडली आहे. करोनाबाधितांवर उपचारासाठी प्रयत्नांची शर्थ केली जात असताना करोनाबाधितांच्या मृत्यूंची संख्या काही देशांमध्ये वाढत आहे. दक्षिण अमेरिकेत करोनाचा संसर्ग फैलावला असून बोलिव्हियात परिस्थिती चिंताजनक आहे. बोलिव्हियातील रस्त्यांवर मृतदेह पडले असल्याचे समोर आले असून त्यातील बहुतांशी करोनाबाधितांचे मृतदेह आहेत.

मागील पाच दिवसांत बोलिव्हिया पोलिसांनी प्रमुख शहरातील रस्त्यांवरून आणि घरांमधून ४०० जणांचे मृतदेह ताब्यात घेतले आहेत. यातील जवळपास ८५ टक्के जणांचा मृत्यू करोनाच्या संसर्गाने झाला असण्याची शक्यता पोलिसांनी व्यक्त केली आहे. एएफपी या वृत्तसंस्थेने दिलेल्या वृत्तानुसार, बोलिव्हियातील शहर कोचाबांबामधूनन जवळपास १९१ मृतदेह ताब्यात घेतले आहेत. त्याशिवाय, आलावा पाज शहरातून १४१ मृतदेह ताब्यात घेतले आहेत. हे मृतदेह घरातच कुजत होते अथवा रस्त्यावर पडले होते. नॅशनल पोलीस संचालक कर्नल इवान रोजास यांनी सांगितले की, अशी भयावह परिस्थिती त्यांनी याआधी कधीही पाहिली नव्हती. देशातील सर्वात मोठे शहर सांताक्रूझमधील रस्त्यांवरूनही ६८ मृतदेह ताब्यात घेण्यात आले. या शहराच्या अवतीभोवतीच्या परिसरात, भागात देशातील एकूण बाधितांपैकी ५० टक्के रुग्ण याच ठिकाणचे आहेत. या एका शहरात आतापर्यंत ६० हजारांहून अधिक प्रकरणे समोर आली आहेत.

कर्नल रोजास यांनी सांगितले की, पोलिसांनी ताब्यात घेतलेल्या मृतदेहांपैकी ८५ टक्के मृतदेह हे करोनाबाधितांचे आहेत. यातील काहीची चाचणी करण्यात आली आहे. काही जणांचा मृत्यू भूक, हिंसाचारामुळे झाला आहे. सांताक्रूझ शहरानंतर ला पाज शहर आता करोना संसर्गाचा हॉट स्पॉट झाला आहे. दररोज नव्याने हजारोंच्या संख्येने रुग्ण आढळत आहेत. एक एप्रिलपासून आतापर्यंत तीन हजारांहून मृतदेह आढळले आहेत. बोलिव्हियात ६० हजारांहून अधिक करोनाबाधित असून २२०० जणांचा करोनाच्या संसर्गाने मृत्यू झाला असल्याची अधिकृत आकडेवारी सांगते.

दरम्यान, जगभरात करोनाबाधितांची संख्या सातत्याने वाढत आहे. जगभरातील करोनाबाधितांची संख्या दीड कोटींच्या घरात पोहचली आहे. तर, सहा लाखांहून अधिकजणांचा मृत्यू झाला आहे. अमेरिकेत करोनाचा सर्वाधिक संसर्ग फैलावला असून ३८ लाखांहून अधिक करोनाबाधित आहेत. तर, एक लाख ४० हजारजणांचा मृत्यू झाला आहे. ब्राझीलमध्ये २१ लाख करोनाबाधित असून ८१ हजार जणांचा मृत्यू झाला आहे. तर, भारतात करोनाबाधितांची संख्या ११ लाख ५० हजारांहून अधिक झाली आहे.

Recent Posts