loader
Foto

'कोविड-१९'चे संशोधन चिनी हॅकर्सच्या निशाण्यावर!'

 

वॉशिंग्टन: अमेरिका आणि चीनमधील वाद शमण्याची चिन्हं नाहीत. करोना संसर्गासाठी चीन जबाबदार असल्याचा आरोप अमेरिकेकडून सातत्याने होत असताना आता आणखी एक आरोप अमेरिकेने चीनवर केला आहे. करोना प्रतिबंधक लस विकसित करणाऱ्या कंपन्या चिनी हॅकर्सच्या निशाण्यावर असल्याचे अमेरिकेच्या न्याय विभागाने म्हटले आहे.

अमेरिकेच्या न्याय विभागाच्या अधिकाऱ्यांनी म्हटले की, नुकत्याच काही महिन्यांमध्ये करोना लस आणि उपचारांशी संबंधित असणाऱ्या काही कंपन्यांची नावे सार्वजनिकरीत्या जाहीर झालेली आहेत. या कंपन्यांच्या नेटवर्किंगमधील कमतरता हॅकर्सने शोधून काढले असल्याचे अधिकाऱ्यांनी म्हटले. इतकंच नव्हे तर चिनी हॅकर्सच्या निशाण्यावर जगभरातील इतर कंपन्यादेखील आहेत. या कंपन्यांच्या व्यापाराशी संबंधित कोट्यवधी डॉलर किंमतीची माहिती या चिनी हॅकर्सने चोरली असल्याचा दावा अमेरिकेने केला आहे.

दरम्यान, याआधीदेखील रशियाच्या गुप्तचरांकडून करोना लशीबाबतची माहिती चोरी करण्याचा प्रयत्न होत असल्याचा आरोप अमेरिका, ब्रिटन आणि कॅनडाने केला होता. ब्रिटनच्या नॅशनल सायबर सिक्युरिटी सेंटरने (एनसीएससी) म्हटले की, करोना प्रतिबंधक लस विकसित करणाऱ्या संस्थांना रशियन हॅकर्स लक्ष्य करत आहेत. रशियन हॅकर्स हे रशियन गुप्तचर संस्थेचा भाग म्हणून काम करत असल्याचा दावा त्यांनी केला आहे. एनसीएससीचे संचालक पॉल चिचेस्टर यांनी हे कृत्य निंदनीय असून मेलवेअरचा वापर करून हॅकर्सने करोना लशीबाबत असलेली माहिती चोरी करण्याचा प्रयत्न केला आहे. अमेरिका, ब्रिटन आणि कॅनडाने म्हटले की, हॅकिंग करणारे 'एपीटी२९' करोना संसर्गाशी संबंधित माहिती चोरत आहेत. कोझी बिअर म्हणून ओळखला जाणारा हॅकर्सचा गट हा रशियाच्या गुप्तचर संस्थेचा एक भाग आहे.

गुप्तचर संस्थांचे अधिकारी सातत्याने या चोरीच्या प्रयत्नांवर लक्ष ठेवून आहेत. आतापर्यंत माहिती चोरीला गेली का, हे स्पष्ट झाले नाही. मात्र, राष्ट्रीय सायबर सुरक्षा केंद्राच्या दाव्यानुसार, आतापर्यंत कोणतीही गुप्त माहिती चोरीला गेलेली नाही. अमेरिकेने याआधी कोझी बीअर हॅकिंग गटाबाबत माहिती मिळवली होती. हा गट रशियन सरकारशी निगडीत असलेल्या गटांपैकी एक आहे. या गटाने २०१६मध्ये झालेल्या राष्ट्राध्यक्ष निवडणुकीपूर्वी काही इमेल चोरले असल्याचे समोर आले होते.

Recent Posts