loader
Foto

चाबहार रेल्वे प्रकल्पात भारताचाही सहभाग; इराणचे स्पष्टीकरण

तेहरान: इराणमधील चाबहार रेल्वे प्रकल्पातून भारताला वगळण्यात आले नसल्याचे स्पष्टीकरण इराणने दिले आहे. इराण-चीनमध्ये होत असलेल्या कराराच्या पार्श्वभूमीवर इराणने हा निर्णय घेतला असल्याचे वृत्त होते. मात्र, इराणने या वृत्ताचा इन्कार केला असून भारत अजूनही या प्रकल्पाचा हिस्सा असल्याचे इराणने म्हटले आहे.

चाबहार रेल्वे प्रकल्पातून भारताला वगळण्यात आले असल्याचे वृत्त अफवा असल्याचे इराणने म्हटले आहे. या वृत्तामागे काहीतरी कट असावा अशी शक्यता इराणचे परिवहन आणि रेल्वे विभागाते उपमंत्री सईद रसौली यांनी सांगितले. हा रेल्वे मार्ग चाबहार बंदरापासून ते जहेदान दरम्यान असणार आहे. चाबहार रेल्वे प्रकल्पानुसार, चाबहार बंदरापासून जहेदानपर्यंत रेल्वे मार्ग सुरू करण्यात येणार होता. काही दिवसांपूर्वी इराणचे परिवहन आणि शहर विकास मंत्री मोहम्मद इस्लामी यांनी ६२८ किमी लांबीच्या रेल्वे मार्गाचे उद्घाटन केले होते. या रेल्वे मार्ग अफगाणिस्तानच्या सीमेपर्यंत जाणार असल्याचे वृत्त 'द हिंदू'ने दिले होते. हा रेल्वे प्रकल्प मार्च २०२२ पर्यंत पूर्ण करण्यात येणार आहे. या रेल्वे प्रकल्पासाठी भारताकडून निधी येणार होता. मात्र, कराराच्या चार वर्षानंतरही हा निधी न आल्यामुळे इराणने भारताला या प्रकल्पातून वगळले असल्याचे वृत्त 'द हिंदू'ने दिले होते.

 

तप्रधान नरेंद्र मोदी यांनी २०१६ मध्ये इराणचा दौरा केला होता. त्यावेळी या चाबहार करारावर स्वाक्षरी करण्यात आली. या संपूर्ण प्रकल्पासाठी १.६ अब्ज डॉलरची गुंतवणूक अपेक्षित होती. या रेल्वे मार्गाच्या प्रकल्पासाठी भारतीय अभियंते इराणलाही गेले होते. मात्र, अमेरिकेच्या निर्बंधाच्या भीतीमुळे या प्रकल्पाचे काम सुरू झाले नसल्याची चर्चा आहे. भारताने याआधीच इराणकडून तेल आयात कमी केली आहे.

भारताने इराणमधील चाबहार बंदराच्या विकासासाठी अब्जावधी रुपये खर्च केले आहेत. सध्या सुरू असलेल्या इराण-अमेरिकेच्या वादामुळे भारत आणि इराणचेही संबंध अतिशय नाजूक वळणावर आहेत. चाबहार बंदर भारतासाठी अतिशय महत्त्वाचे आहे. चीनने पाकिस्तानमध्ये विकसित केलेल्या ग्वादर बंदरापासून हे बंदर अवघ्या १०० किमी अंतरावर आहे. त्यामुळे पाकिस्तान आणि चीनला शह देण्यासाठी भारतासाठी इराण महत्त्वाचा देश ठरू शकतो.

चीन आणि इराणमध्ये ४०० अब्ज डॉलरचा महाकरार होणार असल्याची चर्चा आहे. या करारानुसार चीन इराणकडून अतिशय स्वस्त दरात तेल खरेदी करणार आहे. इतकंच नव्हे तर इराण अत्याधुनिक शस्त्रेदेखील देणार आहे. इराण आणि चीनममध्ये २५ वर्षासाठी रणनितीक करार होणार असल्याचे वृत्त न्यूयॉर्क टाइम्सने दिले आहे.

 

Recent Posts