loader
Foto

Coronavirus करोना: 'या' देशाची आणखी एक लस चाचणीच्या तिसऱ्या टप्प्यात

बीजिंग: जगभरातील जवळपास २०० देशांमध्ये फैलावलेल्या करोना विषाणूला अटकाव करण्यासाठी विविध पातळीवर प्रयत्न सुरू असतानाच विषाणूला अटकाव करणारी लस दृष्टीपथात दिसू लागली आहे. ऑक्सफोर्ड विद्यापीठाने विकसित केलेली लस पहिल्या टप्प्यात यशस्वी झाल्याचे वृत्त असताना आता चीनच्या आणखी एका लशीने चाचणीचा दुसरा टप्पाही पार केला आहे.

वैद्यकीय क्षेत्रातील नियतकालिक दि लँसेंटमध्ये याबाबतचे संशोधन प्रकाशित झाले आहे. चीनची ही लस 'अॅडनोव्हायरस टाइप-५' वायरल वेक्टरपासून विकसित केली आहे. या लशीची निर्मिती CanSino Biologics आणि लष्कराची एक युनिट संयुक्तपणे करत आहे. या लशीची चाचणी वुहानमध्ये करण्यात आली होती. या लशीची चाचणी १८ वर्षावरील निरोगी स्वयंसेवकांवर करण्यात आली.

या दुसऱ्या टप्प्यातील चाचणीत ६०३ स्वयंसेवकांचा समावेश होता. लस टोचल्यानंतर शरीरात २८ व्या दिवशी व्हायरसशी लढणारे अॅण्टीबॉडी आढळून आले. ही लस अद्याप करोनाबाधितांना देण्यात आली नाही. 'द लँसेंट'ने म्हटले की, तिसऱ्या टप्प्यातील चाचणीनंतर ही लस SARS-CoV-2 च्या विषाणूशी लढण्यास किती सक्षम आहे, हे समोर येईल. मानवी चाचणी दरम्यान ही लस टोचल्यानंतर त्याचे कोणतेही दुष्परिणाम झाले नाहीत. ही लस सुरक्षित असल्याचाही दावा करण्यात आला आहे. चीनच्या आणखी एका लशीने तिसऱ्या टप्प्यातील चाचणीला सुरुवात केली आहे. या टप्प्यात १५ हजारजणांना लस देण्यात येणार आहे.

 

ऑक्सफोर्डच्या लशीकडून अपेक्षा वाढल्या
'द लँसेंट'मध्ये प्रकाशित झालेल्या दुसऱ्या संशोधनानुसार, वायरल वेक्टरपासून विकसित झालेली ऑक्सफोर्ड विद्यापीठ आणि AstraZeneca ची लस मानवी चाचणीतील पहिल्या टप्प्यात यशस्वी झाली आहे. करोनाला अटकाव करणारी ChAdOx1 nCoV-19 लस प्रभावी असल्याचे समोर आले आहे. या लशीची आता दुसऱ्या टप्प्यातील चाचणी लवकरच सुरू होणार आहे. या लशीमुळे दुहेरी संरक्षण मिळणार आहे. शरीरात अॅण्टीबॉडीज आणि विषाणूंना मारणाऱ्या पेशीची (टी-सेल) निर्मिती झालेली आढळून आली. अॅण्टीबॉडीज महिनाभरात निघून जात असल्या, तरी टी-सेल अनेक वर्षे रक्ताभिसरणात राहू शकतात. त्यामुळे ही लस महत्त्वाची ठरणार असल्याचे म्हटले जाते.

अमेरिकेतील अमेरिकेतील मॉडर्ना इंक (Moderna Inc)कंपनीने विकसित केलेल्या लशीची आता अंतिम टप्प्यातील चाचणी सुरू होणार आहे. मॉडर्ना इंक (Moderna Inc)कंपनीच्या लशीची तिसऱ्या टप्प्यातील चाचणीची सुरुवात २७ जुलैपासून सुरू होणार आहे. अमेरिकेतील ८७ ठिकाणी या लशीची चाचणी घेण्यात येणार आहे. यामध्ये जवळपास ३० हजारजणांना ही लस टोचण्यात येणार आहे.

Recent Posts