loader
Foto

Coronavirus करोनाबाधित आईला पाहण्यासाठी रुग्णालयाची भिंत चढायचा पण...

जेरुसलेम: करोनाच्या आजारामुळे जगभरात भीषण परिस्थिती निर्माण झाल्याचे चित्र आहे. करोनाबाधित असलेल्या आपल्या नातेवाईकांना भेटण्यास, त्यांची सुश्रुषा करण्यासही बंधने आली आहेत. करोनाबाधित आईवर रुग्णालयात उपचार सुरू असताना तिला पाहण्यासाठी डॉक्टरांनी एका युवकाला नकार दिला. मात्र, आईच्या भेटीसाठी व्याकूळ झालेला हा मुलगा थेट रुग्णालयाच्या भिंतीवर चढून खिडकीत बसत होता. मात्र, या मुलाला आईच्या अखेरच्या दिवसात तिच्याशी दोन शब्दही बोलता आले नाहीत.

करोनाच्या या संकट काळात मानवी संवेदनशीलतेची कसोटी लागत असताना काही घटनांमुळे अनेकांची मने सुन्न झाली आहेत. अशीच एक हृदयद्रावक घटना समोर आली आहे. ही घटना पॅलेस्टाइनमधील असून या युवकांचे छायाचित्र सध्या सोशल मीडियावर व्हायरल झाले आहे. पॅलेस्टाइनमधील या युवकाच्या आईला करोनाची बाधा झाल्यानंतर तिला रुग्णालयात दाखल करण्यात आले. मात्र, आईला भेटण्यासाठी डॉक्टरांनी त्या युवकाला परवानगी दिली नाही. त्यामुळे उपचार घेत असलेल्या आईला पाहण्यासाठी त्याने रुग्णालयाच्या खिडकीचा आधार घेतला. रुग्णालयाची भिंत चढून हा युवक उपचार घेत असलेल्या आईला खिडकीमध्ये बसून अनेक तास पाहत असायचा. मात्र, या युवकाच्या आईचा १६ जुलै रोजी मृत्यू झाला.

दरम्यान, पॅलेस्टाइनमध्ये ८९१६ जणांना करोनाची बाधा झाली असून ६३ जणांचा मृत्यू झाला आहे. जगभरातील अनेक देशांमध्ये करोनाचे थैमान सुरू आहे. मागील काही दिवसांत करोनाबाधितांची संख्या सातत्याने वाढत असून एक कोटीहून अधिकजणांना करोनाची बाधा झाली आहे. तर, सहा लाखांहून अधिकजणांचा करोनाच्या आजारामुळे मृत्यू झाला आहे. तर, ८९ लाख बाधितांनी करोनावर मात केली आहे. अमेरिकेत सर्वाधिक करोनाबाधित असून ३९ लाखांहून अधिकजणांना करोनाची बाधा झाली आहे. तर, ब्राझीलमध्ये २१ लाख आणि भारतात ११ लाख करोनाबाधित आहेत.

भारतात, रुग्ण संख्येने १० लाखांचा आकडा ओलांडला असला तरी आजारावर मात करणाऱ्यांचे प्रमाण अधिक आहे. देशात करोना रुग्णांचे बरे होण्याचे प्रमाण हे ६३.२५ टक्के इतके झाले आहे. करोनाचे बहुतेक रुग्ण हे सौम्य लक्षण असलेले आहेत. एकूण रुग्णसंख्येपैकी फक्त ०.३२ टक्के रुग्ण हे व्हेंटिलेटरवर आहेत. तर ३ टक्क्यांहून कमी रुग्णांना ऑक्सिजनची गरज असल्याचे केंद्र सरकारने म्हटले आहे.

Recent Posts