loader
Foto

गलवान संघर्ष: मृत सैनिकांच्या अंत्यविधीस चीन सरकारची आडकाठी

वॉशिंग्टन: गलवान खोऱ्यातील संघर्षाला एक महिना पूर्ण होत आला, तरी त्या ठिकाणी जीवितहानी झाल्याचे मान्य करण्यास चीनचे लष्कर तयार नाही. किंबहुना, या संघर्षात जीव गमावलेल्या सैनिकांचा अंत्यविधी पारंपरिक पद्धतीने न करण्यासाठी सैनिकांच्या कुटुंबीयांवर सरकार दबाव आणत आहे, असे अमेरिकेच्या गुप्तचर संस्थेच्या माहितीत समोर येत आहे. चीनने मात्र सैनिकांवरील अंत्यसंस्कारांचे वृत्त फेटाळले आहे.

चीनकडून प्रत्यक्ष नियंत्रण रेषेवरील परिस्थिती बदलण्याचा प्रयत्न करण्यात आल्यानंतर, १५ जूनच्या रात्री भारत व चीन यांच्या लष्करामध्ये संघर्ष झाला. या घटनेमध्ये भारतीय लष्करातील कर्नल संतोष बाबू यांच्यासह २० जवान हुतात्मा झाले होते. तर, चीनच्या सैन्याचीही मोठी हानी झाली होती. पंतप्रधान नरेंद्र मोदी यांनी 'मन की बात'मध्येही या संघर्षाचा उल्लेख करत, हुतात्मा सैनिकांच्या कुटुंबीयांविषयी सहवेदना व्यक्त केली होती. याउलट चीनने काही सैनिक मारले गेल्याचे मोघम उत्तर देत, कोणतीही माहिती उघड केली नाही. भारतीय लष्कराच्या अंदाजानुसार, चीनचे ४३ सैनिक मारले गेले किंवा गंभीर जखमी झाले आहेत. तर, अमेरिकेच्या गुप्तचर अहवालानुसार, ३५ चिनी सैनिकांना या संघर्षात प्राण गमवावा लागला आहे. या सैनिकांचा मृत्यू नाकारतानाच, त्यांच्यावर अंत्यविधी करण्यापासूनही रोखण्यासाठी चिनी सरकार कुटुंबीयांवर दबाव आणत आहे. प्रत्यक्ष सीमा रेषेवर झालेल्या चुकीला झाकण्यासाठी चीनकडून हा प्रयत्न करण्यात येत असल्याचे मानण्यात येते.

चीनच्या नागरी व्यवहार मंत्रालयाकडून मृत सैनिकांच्या कुटुंबीयांशी संपर्क साधण्यात येत आहे. कुटुंबीयांनी पारंपरिक अंत्यविधी करायचा नाही. या सैनिकांवर पार्थिवावर दूर ठिकाणी अंत्यसंस्कार करण्याची सूचना करण्यात येत असल्याची माहिती सूत्रांनी दिली. या सूचनांना करोनाचा प्रादुर्भाव रोखण्यासाठीचा मुलामाही चढविण्यात आला आहे. करोना रोखण्यासाठीची जागृती करण्याचा प्रयत्न दाखवितानाच, नागरिकांनी हा संघर्ष विसरून जावा, यासाठीचा हा प्रयत्न असल्याचे मानण्यात येत आहेत.

दरम्यान, सत्ताधारी कम्युनिस्ट पक्षाच्या या निर्णयामुळे मृत सैनिकांच्या कुटुंबीयांमध्ये अस्वस्थता आहे. या कुटुंबीयांकडून 'विबो' आणि अन्य माध्यमातून संताप व्यक्त करण्यात येत असल्याचे वृत्त अमेरिकेतील 'ब्रेटबार्ट न्यूज' या माध्यमाने दिले आहे. मृत सैनिकांची माहिती समोर आली, तर चिनी लष्कराच्या प्रतिमेला धक्का बसेल, अशी भीती सरकारला वाटत आहे. 'त्यांना हुतात्मा सैनिक निर्माण करायचे नाहीत. त्यामुळेच, त्यांनी मृत सैनिकांच्या मित्र व कुटुंबीयांच्या कार्यक्रमांवर बंदी घातली आहे,' असे एका सूत्राने सांगितले.

सैन्यमाघारीसाठी भारत-चीन चर्चा
नवी दिल्ली : प्रत्यक्ष नियंत्रण रेषेवर आणखी सैन्य माघारी घेण्यासाठी भारत आणि चीनच्या वरिष्ठ अधिकाऱ्यांमध्ये मंगळवारी चर्चेला सुरुवात झाली. पँगाँग त्सो आणि डेप्सांगसह प्रत्यक्ष नियंत्रण रेषेवरून मोठ्या प्रमाणात सैन्य आणि शस्त्रास्त्रे विशिष्ट कालावधीत माघारी घेण्यासाठी या बैठकीत चर्चा अपेक्षित आहे. चुशूल येथे ही चर्चा होत असून, भारताच्या वतीने १४व्या कोअरचे प्रमुख लेफ्टनंट जनरल हरिंदरसिंग, तर चीनकडून मेजर जनरल लिउ लिन चर्चेत सहभागी झाले आहेत. प्रत्यक्ष नियंत्रण रेषेवरील परिस्थिती पाच मेपूर्वी होती, त्याप्रमाणे करण्याची भारताची भूमिका आहे. चीनने गलवाख खोरे, गोग्रा या भागातून सैन्य माघारी घेतले असून, फिंगर ४ आणि पँगाँग त्सो भागातील सैन्यसंख्याही कमी केली आहे.

Recent Posts