loader
Foto

Donald Trump अमेरिका राष्ट्रध्यक्षपद निवडणुकीत ट्रम्प खेळणार 'हा' डाव!

वॉशिंग्टन: अमेरिकेतील अध्यक्षपदाच्या निवडणुकीत पुन्हा विजय मिळवण्यासाठी अध्यक्ष डोनाल्ड ट्रम्प यांनी पुन्हा वर्णवादी अस्मितेला फुंकर घालणे सुरू केले आहे. गेले काही दिवस ते सातत्याने गौरवर्णीयांच्या असंतोषाला चिथावणी देत असून, त्याद्वारे समर्थकांना प्रचारात उतरवण्याचा त्यांचा उद्देश आहे. ट्रम्प यांच्या विखारी प्रचाराने त्यांच्या पक्षातही अस्वस्थता असून या प्रचारतंत्रामुळे तटस्थ मतदारही दूर जात असल्याची त्यांची भावना आहे. ट्रम्प यांनी २०१६च्या निवडणुकीतही ध्रुवीकरणाचा मार्ग अवलंबला होता. तसाच आता सांस्कृतिक विभाजनाचा त्यांचा प्रयत्न आहे.

'आगीत कोण तेल ओतत आहे हे महत्त्वाचे नाही; तर गौरवर्णीयांमध्ये असंतोष आणि भीती निर्माण होईल असे केले जाणारे आवाहन समजून घेण्याची गरज आहे,' असे मत प्रिन्स्टन विद्यापीठातील आफ्रिकन अमेरिकन अभ्यास विभागाचे प्रमुख एडी ग्लॉड यांनी व्यक्त केले आहे. नव्या अमेरिकेत गौरवर्णीयांचे स्थान काय, हा खरा मुद्दा असल्याचेही ते म्हणतात.

ट्रम्प हे गेले अनेक दिवस सातत्याने विखारी भाषा प्रचारात वापरत आहेत. ते विशिष्ट तक्रारीही करत आहेत. देशात वांशिक अन्यायाविरुद्ध वातावरण तापलेले असताना ट्रम्प यांनी चालवलेली मोहीम अधिक टोकदार होत आहे. ट्रम्प यांनी नुकताच एका समर्थकाने पाठविलेला 'व्हाइट पॉवर' व्हिडिओ शेअर केला होता, पण तो लगेचच डिलीटही केला. 'ब्लॅक लाइव्हज‌‌् मॅटर' चळवळीचीही त्यांनी 'द्वेषाचे प्रतीक' म्हणून खिल्ली उडवली. कार रेसिंग कंपनी 'नॅसकार'ने त्यांच्या गाड्यांवरील संघराज्याचा ध्वज उतरवल्याबद्दल त्यांनी जोरदार टीका केली आणि कंपनीच्या कृष्णवर्णीय चालकांवर आरोपही केले. चालक लबाड असल्याचे ते म्हणाले.

अमेरिकेच्या स्वातंत्र्यदिनी त्यांनी अमेरिकेच्या ऐतिहासिक वारशाचे जोरदार समर्थन केले होते. 'हा वारसा पुसण्याचा प्रयत्न करणारे आपला गौरव आणि आपली महान प्रतिष्ठा विसरले आहेत. १७७६च्या हिरोंचे पुतळे पाडून ते देशाबद्दल असणारी प्रेमाची आणि निष्ठेची भावना पुसण्याचा प्रयत्न करत आहेत,' असे ट्रम्प म्हणाले होते.

निवडणुकांच्या पार्श्वभूमीवर ट्रम्प यांचे प्रतिमा उभारणीचे प्रयत्न सुरू असतानाच त्यांच्या पुतणीने मात्र त्यांच्यावर टीकेचे बाण सोडले आहेत. विनाशकारी, विद्ध्वंसक माणूस असे वर्णन त्यांनी पुस्तकातून केले आहे. मेरी एल. ट्रम्प यांनी ट्रम्प यांना अध्यक्षपदाची दुसरी टर्म मिळणे म्हणजे अमेरिकी लोकशाहीचा शेवट करण्यासारखे असल्याचे म्हटले आहे. हे पुस्तक प्रकाशित होईपर्यंत हजारो अमेरिकी नागरिकांचे जीव ट्रम्प यांच्या जाणीवपूर्वक दुर्लक्ष करण्याच्या धोरणाने घेतले असतील, असे त्यांनी म्हटले आहे. 'टू मच अॅण्ड नेव्हर इनफ, हाऊ माय फॅमिली क्रिएटेड द वर्ल्ड्स मोस्ट डेंजरस मॅन' हे पुस्तक त्यांनी लिहिले असून त्यातून अनेक धक्कादायक खुलासे केले आहेत.

Recent Posts