loader
Foto

Coronavirus भारतात दररोज पावणे तीन लाख करोनाबाधित आढळण्याचा धोका!

न्यूयॉर्क: करोनाबाधितांच्या वाढत्या संख्येमुळे भारतात चिंता व्यक्त केली जात आहे. सर्वाधिक करोनाबाधितांच्या संख्येत भारत आता तिसऱ्या स्थानी असून वाढत्या मृत्यूदरामुळे चिंता व्यक्त केली जात आहे. करोना संसर्गाला अटकाव न केल्यास फेब्रुवारी २०२१ पासून भारतात सुमारे पावणे तीन लाख नवीन करोनाबाधित आढळणार असल्याचा इशारा देण्यात आला आहे.

जगभरात करोनाच्या संसर्गाचे थैमान सुरू आहे. करोनाबाधितांची संख्या एक कोटीहून अधिक झाली असून पाच लाखांहून अधिकजणांचा बळी गेला आहे. जगभरातील ८४ देशांमध्ये होणाऱ्या चाचण्या आणि करोनाबाधितांचा अभ्यास करून Massachusetts Institute of Technology (MIT)ने आपला अहवाल तयार केला आहे. या अहवालानुसार, करोनावर औषध न सापडल्यास, करोनावर नियंत्रण न मिळवल्यास भारतात फेब्रुवारी २०२१पासून दररोज पावणे तीन लाख नवीन करोनाबाधित रुग्ण आढळण्याचा धोका आहे. ही भीती खरी ठरल्यास भारत हा सर्वाधिक करोनाबाधितांचा देश होऊ शकतो, असा इशाराही देण्यात आला आहे. तर, दुसरीकडे मार्च ते मे २०२१ पर्यंतच्या कालावधीत जगभरात २० ते ६० कोटी रुग्ण संख्या होण्याचा धोका असून सुमारे १७ लाखांहून अधिकजणांचा मृत्यू होण्याची भीती व्यक्त करण्यात आली आहे. एका गृहीतकाच्या आधारे हा अंदाज व्यक्त करण्यात आला असल्याचेही संस्थेने स्पष्ट केले आहे.

तर, फेब्रुवारी २०२१ दरम्यान, अमेरिकेत दररोज ९५ हजार ४००, दक्षिण अफ्रीकेत २० हजार ६००, इराणमध्ये १७ हजार, इंडोनेशियात १३ हजार २००, ब्रिटनमध्ये ४२००, नायजेरियात चार हजार, तुर्कीमध्ये चार हजार, फ्रान्समध्ये ३३०० आणि जर्मनीत तीन हजार रुग्ण आढळून येण्याचा अंदाज वर्तवण्यात आला आहे.

दरम्यान, जागतिक आरोग्य संघटनेकडून २९ जून रोजी प्रसिद्ध झालेल्या ताज्या माहितीनुसार वैद्यकीय प्रक्रियेच्या माध्यमातून पाच मायक्रॉनहून लहान थेंब अथवा एरोसोल तयार झाले, तरच या विषाणूचा हवेतून प्रसार शक्य आहे. मास्कचा वापर, सुरक्षित वावर आणि सतत हात धुणे ही काळजी घेतली तर करोना विषाणूपासून दूर राहता येणे शक्य आहे, असे जागतिक आरोग्य संघटनेचे म्हणणे आहे. तर, करोना आजारावर मात करण्यासाठी महत्त्वाचे समजले जाणारे रेमडेसिविर औषध भारतात आता स्वस्त दरात उपलब्ध होणार आहे. अमेरिकन कंपनीकडून रेमडेसिविरचा पुरवठा होणार आहे. अमेरिकन औषध कंपनी मायलिन एनव्हीने ही घोषणा केली आहे. औषध कंपनी असलेल्या गिलिएड सायन्सचे अॅण्टी व्हायरल औषझ रेमडेसिविरचे जेनेरिक व्हर्जन भारतीय रुग्णांसाठी तयार करण्यात आले आहे. भारतात या औषधाची किंमत ४८०० रुपये असणार असल्याची माहिती कंपनीने दिली आहे.

Recent Posts