loader
Foto

Facebook फेसबुकचा ट्रम्प यांना दणका; 'या' अकाउंटवर केली कारवाई

वॉशिंग्टन: अमेरिकेचे राष्ट्राध्यक्ष डोनाल्ड ट्रम्प आणि ट्विटरचा वाद झाल्यानंतर ट्रम्प यांनी सोशल मीडिया कंपन्यांवर जोरदार टीका केली होती. त्यानंतर आता ट्रम्प आणि फेसबुकमध्येही वाद होण्याची चिन्हं आहेत. मागील महिन्यात ट्रम्प यांच्या जाहिराती हटवल्यानंतर आता फेसबुकने डोनाल्ड ट्रम्प यांच्या जवळच्या चार सहकाऱ्यांचे अकांउट बंद केले आहे.

अमेरिकेच्या राष्ट्राध्यक्षपदाच्या निवडणुकीसाठी प्रचार सुरू झाला असून सोशल मीडियाचाही मोठ्या प्रमाणावर वापर करण्यात येत आहे. खोट्या बातम्यांचेही प्रमाण वाढले असून ट्रम्प फेक न्यूजचा आधार घेत असल्याचा आरोप करण्यात येतो. मागील महिन्यात ट्रम्प यांच्या एका जाहिरातीवर आक्षेप घेत फेसबुकने ती जाहिरात हटवली होती. त्यानंतर आता ट्रम्प यांचे सहकारी रॉजर स्टोन यांच्यासह चारजणांचे फेसबुक अकाउंट बंद करण्यात आले आहे. फेसबुकने सांगितले की, खोटे अकाउंट असणे, परदेशी हस्तक्षेप आणि खोट्या बातम्या, साहित्य प्रसारीत करण्याविरोधातील धोरणांतर्गत ही कारवाई करण्यात आली आहे. आमच्या चौकशीनुसार, रॉजर स्टोन आणि इतर सहकाऱ्यांचे फेसबुक अकाउंट परदेशातून संचलित करण्यात येत होते. त्याशिवाय या अकांउटवरील मजकूराबाबत साशंकता निर्माण झालेली. त्यामुळे फेसबुकच्या धोरणानुसार, स्वयंचलित प्रणालीने या अकाउंटवर कारवाई केली. त्याशिवाय फेसबुकने इतरही फेक अकाउंटवर कारवाई केली. फेक न्यूज आणि द्वेष पसरवणाऱ्या पोस्टच्या मुद्यावर फेसबुकवर टीका सुरू आहे. फेसबुकच्या माध्यमातून निवडणुकीदरम्यान, जनमतावर प्रभाव टाकण्यात येत असल्याचा आरोप सातत्याने करण्यात येत आहे.

दरम्यान, मागील महिन्यात फेसबुकने ट्रम्प यांची एक राजकीय जाहिरात हटवली होती. ट्रम्प यांच्या जाहिरातीमध्ये लाल रंगाचा उलटा त्रिकोण दर्शवला होता. या चिन्हाचा वापर नाझींनी राजकीय कैदी, कम्युनिस्ट आणि छळछावणीत कैद असलेल्या नागरिकांसाठी केला होता. फेसबुकचे नॅथेनियल ग्लीचर यांनी ट्रम्प यांची जाहिरात हटवण्यात आली असल्याचे मान्य केले आहे. द्वेष पसरवणाऱ्या कोणत्याही विचारधारांशी निगडीत चिन्हांना दाखवण्यास मनाई करण्यात आली आहे. फक्त एखादा संदर्भासह द्वेष पसरवणाऱ्या कृतीचा निषेध करण्यासाठी संबंधित चिन्हाचा वापर करण्यास परवानगी असल्याचे त्यांनी सांगितले.

त्याआधी, मे महिन्याच्या अखेरीस अमेरिकेचे अध्यक्ष डोनाल्ड ट्रम्प यांच्या ट्विटबाबत ट्विटर कंपनीने प्रथमच सावधगिरीचा इशारा दिला होता. ट्रम्प यांनी केलेल्या दोन ट्विटबाबत ट्विटरने इशारा झळकवला. या दोन्ही ट्वीटच्या अखेरीस ट्विटरने एक लिंक दिली आहे. 'मेल इन बॅलट्सची सत्यता तपासा' अशी ही लिंक आहे. या लिंकवर क्लिक केल्यास युजर ट्विटर मोमेंट्स पेजवर पोहोचतात व तेथे ट्रम्प यांनी केलेल्या ट्विटच्या विषयाची सत्यता तपासता येते. तसेच ट्रम्प यांच्या दाव्याबाबतच्या नव्या बातम्याही वाचता येतात. त्यानंतर ट्रम्प यांनी ट्विटरवर नाराजी व्यक्त करत टीका केली होती.

Recent Posts