loader
Foto

Bubonic Plague चीन: करोनानंतर आता आणखी एका संकटाची चाहूल; अलर्ट जारी

बीजिंग: करोनाच्या संकटावर काही प्रमाणात मात केल्यानंतर आता चीनमध्ये आणखी एक संकट उभे ठाकले आहे. उत्तर चीनमधील बयन्नुर शहरातील ब्यूबोनिक प्लेगचा फैलाव झाल्याने खळबळ उडाली आहे. मंगोलियाच्या स्वायत्त क्षेत्रातील बयन्नूर शहरातील ब्युबोनिक प्लेगचे दोन प्रकरणे समोर आली आहेत. संपूर्ण शहरात प्लेगच्या बचावासाठी तीन स्तरीय अलर्ट जारी करण्यात आला आहे.

चीन सरकारचे वृत्तपत्र पीपल्स डेलीच्या ऑनलाइन वृत्तानुसार, हा अलर्ट २०२० वर्षअखेरपर्यंत असू शकतो. प्लेगची बाधा झालेल्या व्यक्तींना वेगळे ठेवण्यात आले आहे. सध्या त्यांच्यावर उपचार सुरू असून प्रकृती स्थिर आहे. ब्यूबोनिक प्लेग विषाणू संसर्गाचे मुख्य कारण असून यामुळे प्राण गमावण्याची शक्यता असते. मात्र, यावर मात करण्यासाठी अॅण्टीबायोटीक उपलब्ध आहे.

प्लेगची बाधा कशी झाली, हे अद्याप स्पष्ट झाले नाही. तीन स्तरीय अलर्ट जारी करण्यात आल्यानंतर आता प्लेग पसरवणाऱ्या प्राण्यांचे मांस खाण्यास बंदी आणली जाऊ शकते. प्लेगची लक्षणे आढळल्यास तात्काळ संपर्क साधण्याचे प्रशासनाने आवाहन केले आहे. जगभरात ब्यूबोनिक प्लेगचे रुग्ण आढळत असतात. मादागास्करमध्ये २०१७ मध्ये ब्यूबोनिक प्लेगचे ३०० हून अधिक रुग्ण आढळले होते.

ब्यूबोनिक प्लेगची लक्षणे
मागील वर्षी मंगोलियात ब्यूबोनिक प्लेगमुळे दोघांचा मृत्यू झाला होता. या बाधितांनी कच्चे मांस खाल्ले असल्याचे समोर आले होते. उंदीर आणि खारीच्या माध्यमातून विषाणू मानवाच्या शरीरात पसरतात. ब्यूबोनिक प्लेग झाल्यामुळे अचानक ताप येणे, डोके दुखी, थंडी, थकवा जाणवणे आदी लक्षणे जाणवतात. अंगावर एका ठिकाणी अथवा अनेक ठिकाणी सूज येते.

दरम्यान, चीनमध्ये करोनाबाधितांच्या नवीन संख्येत घट झाली असल्याचे समोर आले आहे. मागील सात दिवसांपासून राजधानी बीजिंगमध्ये १० पेक्षा कमी करोनाबाधित आढळले आहेत. तीन आठवड्यांपूर्वी नवीन करोनाबाधितांची संख्या ३३४ होती. बीजिंगमध्ये परिस्थिती नियंत्रणात असून ती सतत सुधारत असल्याची माहिती प्रशासनाने दिली. चीनमध्ये कोरोनाबाधितांची संख्या ८३ हजार ५५३ असून ४६३४ जणांना प्राण गमवावे लागले आहे.

तर, दुसऱ्या बाजूला मुसळधार पावसामुळे महापुरानेही चीनमध्ये संकट आले आहे. दक्षिण आणि मध्य चीनमधील पूरात १२ हून अधिक लोकांचा मृत्यू झाला आहे. लाखो लोकांना घरे सोडून जावे लागले आहे. या पुरामुळे सुमारे अडील लाख नागरिकांना सुरक्षितस्थळी हलवण्यात आले आहे. चीनमधील चांगचिंग, गुआंग्झी, झुआंग, यांगशुओ, हुनान, गुईझोऊ, क्वांगटोंग, फुचिन आणि चिचियांगमध्ये हजारो घरे पाण्याखाली आणि चिखलाखाली गेली आहेत.

Recent Posts