loader
Foto

China Dispute भारत, तैवाननंतर आता 'या' देशाच्या भूभागावर चीनचा दावा

थिंफू: दक्षिण चीन समुद्रापासून ते लडाखपर्यंत आक्रमक विस्तारवादी भूमिका घेणाऱ्या चीनने आता आणखी एका देशाच्या भूभागावर दावा ठोकला आहे. चीनने भूतानच्या अभयारण्याच्या वनजमिनीवर दावा केला असून हा भूभागावर चीन-भूतानमध्ये वाद सुरू असल्याचे म्हटले आहे. मात्र, भूतानने हा दावा फेटाळून लावला आहे.

चीनने Global Environment Facility Council च्या ५८ व्या बैठकीत हा दावा केला. भूतानची सकतेंग वन्यजीव अभयारण्याची जमिन ही वादग्रस्त असल्याचा दावा चीनने केला. त्याशिवाय अभयारण्याला मिळणाऱ्या निधीत आडकाठी करण्याचा प्रयत्न चीनने केला. मात्र, भूतानने हा दावा फेटाळून लावला आहे. मागील काही वर्षांत या जमिनीच्या मुद्यावर चीनने कधीच दावा केला नाही. सकतेंग वन्यजीव अभयारण्य हा आमच्या देशाचा अविभाज्य भाग असल्याचे भूतानने चीनला ठणकावले.

इंडिया टुडेने दिलेल्या वृत्तानुसार, या अभयारण्याला जागतिक पातळीवरून निधी देण्यात आला नव्हता. पहिल्यांदाच या अभयारण्याला निधी देण्याची वेळ तेव्हा चीनने आपला दावा ठोकला. चीनच्या विरोधानंतरही कौन्सिलने या प्रकल्पाला मंजुरी दिली. कौन्सिलमध्ये चीनचा प्रतिनिधी आहे. मात्र, भूतानचा थेट प्रतिनिधी नाही. भूतानच्यावतीने भारताचे वरिष्ठ आयएएस अधिकारी अपर्णा सुब्रमणि यांनी प्रतिनिधीत्व केले. जागतिक बँकेत त्या भारतासह बांगलादेश, भूतान, मालदीव, नेपाळ आणि श्रीलंकेच्या प्रभारी आहेत.

 

दरम्यान, चीनच्या विस्तारवादी भूमिकेमुळे त्याचे शेजारील राष्ट्र नाराज आहेत. चीनने आपली आक्रमक विस्तारवादी भूमिका कायम ठेवत मित्र राष्ट्र असलेल्या नेपाळलाही धोका दिला आहे. नेपाळच्या एका गावाचा चीनने ताबा घेतला असल्याचे समोर आल्यानंतर खळबळ उडाली होती. मात्र, चीनने नेपाळचा आणखीही भूभाग घेतला असल्याचे समोर आले. चीनने सीमा बदलासाठी चक्क नद्यांचेही प्रवाह बदलले असल्याचे समोर आल्यानंतर खळबळ उडाली. चीनने मागील काही काळात आपल्या विस्तारवादी धोरणांवर काम करण्यास सुरुवात केली असल्याची चर्चा होती.

तैवान, जपान,भारतासोबत सीमा प्रश्नाला घेऊन चीनसोबतचा तणाव वाढला आहे. अशावेळी आता नेपाळच्या भूभागावर चीनने ताबा मिळवला असल्याचे समोर आले आहे. चीनने तिबेटमध्ये रस्ते निर्मितीच्या नावाखाली सुरू केलेल्या बांधकामा दरम्यान नेपाळच्या भूभागावर ताबा मिळवला आहे. कृषी मंत्रालयाच्या सर्वेक्षण अहवालानुसार, १० जागांवर चीनने ताबा मिळवला असल्याचे समोर आले आहे. त्याशिवाय, नेपाळच्या ३३ हेक्टर जमिनीवर नदीचा प्रवाह बदलून नैसर्गिक सीमा तयार करत ताबा मिळवला असल्याचे अहवालात म्हटले.

Recent Posts