loader
Foto

Bhutan भूतान सरकारने म्हटले ऑल इज वेल! 'या' कारणाने अडवले गेले पाणी

थिंफू: भारताच्या दिशेने येणारे पाणी भूतानने अडवले असल्याचे वृत्त समोर आल्यानंतर गोंधळ उडाला होता. मात्र, भूतानने सरकारने जाणिवपूर्वक पाणी अडवले नसल्याचे समोर आले आहे. चीन, नेपाळनंतर भूताननेदेखील भारताविरोधात पाऊल उचलले असल्याची चर्चा सुरू झाली होती. पाणी अडवल्यामुळे आसाममधील शेतकऱ्यांनी आंदोलनही केले होते. मात्र, आता परिस्थिती सामान्य असल्याचे भूतानने सांगितले आहे.

भारत आणि भूतान या दोन्ही देशांचे संबंध अधिक चांगले राहिले आहेत. मात्र, भूतानने मागील काही दिवसांमध्ये आसाममधील बक्सा जिल्ह्यात येणारे पाणी अडवले आहे. त्यामुळे भारतीय शेतकऱ्यांना नुकसान सहन करावे लागत आहे. बक्सा जिल्ह्यातील २६ हून अधिक गावातील जवळपास सहा हजार शेतकरी सिंचनासाठी डोंग योजनेवर अवलंबून आहेत. स्थानिक शेतकरी आपल्या शेतीसाठी १९५३ पासून भूतानमधून येणाऱ्या नदीच्या पाण्यावर अवलंबून आहेत. भूतानने पाणी अडवल्यानंतर शेतकऱ्यांनी आंदोलन केले असून सरकारकडे ही समस्या सोडवण्याची मागणी केली होती. आसाममधील शेतकऱ्यांनी केलेल्या आंदोलनामुळे या प्रश्नाची चर्चा झाल्यानंतर भूतानने याचे स्पष्टीकरण दिले आहे.

भूतानच्या परराष्ट्र मंत्रालयाने म्हटले की, भारताच्या दिशेने जाणारे नदीचे पाणी अडवले असल्याचे वृत्त चुकीचे आहे. भूतानने असे कोणतेही आदेश दिले नव्हते. पाणी अडवल्याची बाब समोर आल्यानंतर या ठिकाणची पाहणी करण्यात आली. माती, दगडांमुळे पाण्याचा प्रवाह रोखला गेला होता. भूतानच्या नागरिकांनी, कर्मचाऱ्यांनी प्रवाह सुरळीत केला असून आसाममधील नागरिकांना पाणी मिळणार असल्याचे त्यांनी सांगितले. भूतानच्या परराष्ट्र मंत्रालयाने याबाबातचे निवदेन सोशल मीडियावर दिले असून काही छायाचित्रेही पोस्ट केले आहेत. भूतान सरकारने कोणतीही अडवणूक केली नसून काही नैसर्गिक कारणांमुळे पाणी अडवले गेले असल्याचे त्यांनी म्हटले.

आसामचे मुख्य सचिव संजय कृष्णा यांनीदेखील याला दुजोरा दिला आहे. काही नैसर्गिक कारणांमुळे पाण्याचा प्रवाह अडवला गेला होता. याबाबत भूतान सरकारला माहिती देण्यात आल्यानंतर त्यांनी तातडीने कार्यवाही केली असल्याचे कृष्णा यांनी सांगितले. भूतानकडून येणारे पाणी अडवले गेल्यामुळे आसाम बक्सा जिल्ह्यातील २६ गावातील शेतकऱ्यांनी जोरदार आंदोलन केले होते. या आंदोलनामुळे भूतानकडून येणारे पाणी येत नसल्याचे समोर आले. या मुद्यावर केंद्र सरकारलाही टीका सहन करावी लागली.

Recent Posts