loader
Foto

India China खळबळजनक! गलवान खोऱ्यात हिंसाचार झालेल्या ठिकाणी चीनचे बंकर

बीजिंग: लडाखमधील गलवान खोऱ्यात १५ जून रोजी चिनी सैन्यासोबत झालेल्या हिंसाचारात २० भारतीय जवान शहीद झाले होते. त्यानंतर दोन्ही देशांमध्ये प्रत्यक्ष नियंत्रण रेषेवर तणाव निर्माण झाला आहे. तणाव निवळण्यासाठी दोन्ही देशांमध्ये लष्करी अधिकाऱ्यांमध्ये चर्चा झाल्यानंतर दोन्ही देशांनी सैन्य मागे घेण्याबाबत सहमती दर्शवली. मात्र, गलवान खोऱ्यात चीनने बंकर तयार केले असल्याचा दावा करण्यात आला आहे. या दाव्यानंतर खळबळ उडाली आहे.

ओपन सोर्स इंटेलिजेंस अॅनालिस्ट Detresfa ने गलवान खोऱ्यातील सॅटेलाइट इमेज जारी केली आहे. या छायाचित्राच्या आधारे चीन गलवान खोऱ्यात बंकर बनवत असल्याचा दावा करण्यात येत आहे. या ठिकाणी भारतीय जवान आणि चिनी सैन्यात संघर्ष झाला होता. या ठिकाणी चीनने छोट्या भिंती उभारल्या आहेत. या नवीन छायाचित्रामधून चीनच्या मनसुब्यांवरच प्रश्न उपस्थित करण्यात येत आहे. एका बाजूला चीन भारतासोबत चर्चा करत असून दुसऱ्या बाजूला आपली लष्करी ताकद या ठिकाणी वाढवत आहे.

पँगोंग त्सोजवळही चीनची जमवाजमव
चीनची पीपल्स लीबरेशन आर्मीने पँगोंग त्सो तलाव परिसरात अजून ठाण मांडले आहे. इतकेच नव्हे तर हळूहळू चीनची सैन्य लहान गटांद्वारे वाढत आहे. पँगोंग त्सो तलावापासून दक्षिणेकडील भागात १९ किमी अंतरावर चीनची सैन्याची जमवाजमव दिसून आली आहे. पँगोंग त्सो तलावाजवळ भारत आणि चीनचे सैन्य आमने सामने येण्याची दाट शक्यता आहे. या ठिकाणी दोन्ही देशात तणावाची परिस्थिती निर्माण होण्याची शक्यता आहे.

भारत-चीन लष्करी बैठकीत काय झाले?
दरम्यान, पूर्व लडाखमधून सैनिकांना हटवण्याबाबतच्या कार्यवाहीला अंतिम रूप देण्यावर लक्ष केंद्रीत करण्यात आले. प्रत्यक्ष नियंत्रण रेषेवर (एलएसी) ५ मेच्या पूर्वी जशी स्थिती होती तशीच स्थिती आताही असावी असे भारताने या चर्चेदरम्यान चीनसमोर स्पष्ट केले. याचाच अर्थ चीनी सैन्याने माघारी जावे असेच भारताने स्पष्ट शब्दात चीनला सांगितले. दोन्ही पक्षांदरम्यान, त्याच जागी ६ जून या दिवशी दोन्ही देशांदरम्यान लेफ्टनंट जनरल स्तरावरील पहिली बैठक पार पडली होती. त्या बैठकीत दोन्ही पक्षांमधील समस्या दूर करण्यासाठी एक करार करण्यात आला. तथापि, १५ जूनला झालेल्या हिंसक घटनेनंतर सीमेवरील परिस्थिती बिघडली होती.

Recent Posts