loader
Foto

Kim Jong Un दक्षिण कोरियावर लष्करी कारवाई; किम जोंग यांनी घेतला मोठा निर्णय!

सोऊल: मागील दिवसांपासून उत्तर कोरिया आणि दक्षिण कोरियातील तणाव वाढत आहे. उत्तर कोरियातील बंडखोरांना आश्रय दिलेल्या दक्षिण कोरियाविरोधात लष्करी कारवाई करण्याची धमकी उत्तर कोरियाने दिली होती. मात्र, उत्तर कोरियाचे राष्ट्राध्यक्ष किम जोंग उन यांनी या कारवाईला स्थगिती दिली आहे. उत्तर कोरियातील अधिकृत वृत्त संस्था 'कोरियन सेंट्रल न्यूज एजन्सी'ने याबाबतचे वृत्त दिले आहे.

किम जोंग उन यांनी मंगळवारी व्हिडिओ कॉन्फरन्सद्वारे सत्ताधारी वर्कर्स पार्टीच्या केंद्रीय सैन्य आयोगाच्या बैठकीत हजेरी लावली. या बैठकीत दक्षिण कोरियाविरोधातील लष्करी कारवाई स्थगित करण्याचा निर्णय घेण्यात आला. मात्र, हा निर्णय का घेण्यात आला याबाबतचे नेमके कारण समोर आले नाही. दक्षिण कोरियन सरकारने अधिकारी योह संग की यांनी सांगितले की, उत्तर कोरियाच्या हालचालींवर आमचे लक्ष असल्याचे सांगत अधिक माहिती देण्यास नकार दिला.

'फार ईस्टर्न स्टडीज्'चे तज्ञ किम डोंग युब यांनी सांगितले की , उत्तर कोरिया दक्षिण कोरियाकडून काही कारवाई होईल याची प्रतिक्षा करत असेल. उत्तर कोरिया स्वत:ला अधिक मजबूत करण्याचा प्रयत्न करत असेल त्यांनी सांगितले. किम डोंग युब हे दक्षिण कोरियाचे माजी सैन्य अधिकारी आहेत. दोन्ही देशातील लष्करी चर्चेत त्यांनी सहभाग घेतला होता. उत्तर कोरियाने दक्षिण कोरियाविरोधातील कारवाईला स्थगिती दिली आहे. ही कारवाई रद्द केली नाही, याकडेही त्यांनी लक्ष वेधले.
 

दरम्यान, मागील आठवड्यात उत्तर कोरियाचे अध्यक्ष किम जोंग उन यांची बहीण किम यो जोंगने दक्षिण कोरियाला थेट युद्धाची धमकी दिल्यानंतर काही तासांतच उत्तर कोरियाने सीमेवरील दक्षिण कोरियाच्या संपर्क कार्यालयावर बॉम्ब टाकून ते उडवून दिले. कराराद्वारे लष्करविहीन केलेल्या क्षेत्रात पुन्हा प्रवेश करण्याची धमकीही उत्तर कोरियाने केल्यामुळे दक्षिण आणि उत्तर कोरिया या शेजारील देशांमधील संबंध पुन्हा एकदा विकोपाला गेले असल्याचे चित्र होते. गेल्या काही दिवसांपासून उत्तर आणि दक्षिण कोरिया यांच्यामध्ये सातत्याने वाद झडत असून, कारवाईची धमकी उत्तर कोरियाकडून वारंवार देण्यात येत होती. सीमेच्या परिसरात सामरिक हालचाली आणि कथित दुष्प्रचार करणे दक्षिण कोरियाने थांबविलेले नाही, असा उत्तर कोरियाचा आरोप आहे.

दक्षिण कोरियाबाबतच्या संबंधाचे निर्णय घेण्याबाबत किम यो यांची भूमिका निर्णायक असते. त्यामुळे त्यांच्या या इशाऱ्याकडे गांभीर्याने पाहिले जात आहे. किम यो यांनी म्हटले की, 'आम्ही आता थेट कारवाईच करणार आहोत. आमचे सर्वोच्च नेते, आमचा पक्ष, देश आणि मिळालेल्या अधिकाराचा वापर करून शत्रूवर कारवाईचा आदेश देत आहे.'

Recent Posts