loader
Foto

Hajj Pilgrims हज यात्रा होणार की नाही? सौदी सरकारने केली 'ही' घोषणा

दुबई: मुस्लिम धर्मीयांसाठी पवित्र असणाऱ्या हज यात्रेबाबत अखेर सौदी सरकारने मोठी घोषणा केली आहे. हज यात्रेसाठी मर्यादित प्रमाणात यात्रा करण्यास परवानगी देण्यात आली असून हे सर्व यात्रेकरू सौदी अरेबियातीलच असणार आहेत. सौदी अरेबियाबाहेरील यात्रेकरूंना परवानगी नाकारण्यात आली आहे. हज यात्रेसाठी दरवर्षी जवळपास २० लाख लोक सहभागी होत असतात.

सौदी अरेबियाचे हज आणि उमरा विषयक मंत्रालयाने याबाबत एक पत्रक जारी केले आहे. त्यानुसार, करोना संकटाच्या पार्श्वभूमीवर मर्यादित लोकांनाच हज यात्रा करण्याची परवानगी देण्यात येणार असल्याचे सांगण्यात आले आहे. सौदी अरेबियाची स्थापना झाल्यानंतर ९० वर्षांमध्येही कधीही हज यात्रा रद्द करण्यात आली नव्हती. सौदी अरेबियातील राजघराणे मागील अनेक पिढ्यांपासून हज यात्रेचे संरक्षक आहेत.

सौदी अरेबिया सरकारने सांगितले की, लोकांच्या आरोग्याच्यादृष्टीने हा निर्णय घेण्यात आला आहे. फक्त सौदी अरेबियात सध्या वास्तव्यास असलेल्या नागरिकांना हज यात्रेची परवानगी देण्यात येणार आहे. पुढील महिन्यात हज यात्रेला सुरुवात होणार आहे. मात्र, हज यात्रेसाठी कितीजणांना परवानगी देण्यात येणार, याबाबत काहीही माहिती देण्यात आली नाही. 'रॉयटर्स' या वृत्तसंस्थेने दिलेल्या वृत्तानुसार, वयस्कर व्यक्तींना यात्रा करण्यास मनाई करण्यात येणार आहे. त्याशिवाय आरोग्य सुरक्षितेच्यादृष्टीने निर्णय घेण्यात येणार आहे. सौदी अरेबियाच्या अर्थव्यवस्थेत हज आणि उमराह यात्रेकरूंची महत्त्वाची भूमिका आहे. सौदी अरेबियाबाहेरील हज यात्रेकरूंना मनाई करण्यात आल्यामुळे सौदी सरकारला आर्थिक नुकसान सहन करावे लागणार आहे.
 

हज यात्रेचे महत्त्व काय?
इस्लाम धर्माच्या एकूण पाच स्तंभांपैकी हज हा पाचवा स्तंभ आहे. आर्थिकदृष्ट्या सक्षम व स्वस्थ मुसलमांनी आयुष्यात एकदा तरी हज यात्रा केली पाहिजे, अशी अपेक्षा असते. हज यात्रेकडे भूतकाळात केलेली पापं मिटवण्यासाठीचं योग्य स्थान म्हणून पाहिले जाते. हज यात्रेनंतर एखाद्या व्यक्तीचे सगळे पाप माफ केले जातात आणि ती व्यक्ती आपले आयुष्य पुन्हा नव्याने सुरू करू शकतो, असे समजले जाते.

आयुष्यात एकदा तरी हज यात्रा करावी, अशी बहुतांश मुस्लिम बांधवांची इच्छा असते. हज यात्रेचा खर्च करण्यास जे आर्थिकदृष्ट्या कमजोर आहेत, त्यांचा खर्चधार्मिक नेते आणि संघटना करतात. त्याशिवाय अनेक मुस्लिम आपल्या आयुष्यातील बचतीच्या रक्कमेचा काही भाग हा हज यात्रेसाठी राखून ठेवतात. जगातल्या काही भागातले मुसलमान हजारो किलोमीटर चालून काही महिन्यांमध्ये मक्का गाठतात.

Recent Posts