loader
Foto

भीती खरी ठरली! ट्रम्प यांनी दिला भारतीयांना झटका

वॉशिंग्टन: करोनाचा संसर्ग, ढासळत असलेली अर्थव्यवस्था आणि वाढत्या बेरोजगारीच्या मुद्यावर टीकेचे धनी होत असलेले अमेरिकेचे राष्ट्राध्यक्ष डोनाल्ड ट्रम्प यांनी मोठा निर्णय घेतला आहे. ट्रम्प यांनी एच१बी, एच-४ व्हिसा निलंबित करण्याचा निर्णय घेतला आहे. त्यामुळे नव्याने अमेरिकेत नोकरी इच्छिणाऱ्यांना याचा फटका बसणार आहे. हे निलंबन वर्षखेरपर्यंत असणार आहे.

'एच१बी' व्हिसा निलंबन आदेशाचा फटका नव्याने अमेरिकेत नोकरी करण्यासाठी जाणाऱ्या भारतीयांना बसणार आहे. अमेरिकेतील माहिती तंत्रज्ञान कंपन्यांमध्ये भारत आणि चीनमधून हजारो कर्मचाऱ्यांना नोकरी मिळते. विशेषत: भारतीय कर्मचाऱ्यांना अधिक मागणी असते. त्यामुळे ट्रम्प प्रशासनाच्या निर्णयामुळे भारतीयांना मोठा धक्का बसणार आहे. करोनाच्या संकटामुळे याआधीच एच१बी व्हिसाधारकांना नोकरी गमवावी लागली आहे. अनेक भारतीय अमेरिकेतून मायदेशी परतले आहेत. नवीन व्हिसा जारी न झाल्यामुळे हजारो भारतीय युवकांना रोजगार गमावण्याची वेळ येऊ शकते. भारतातही करोनाच्या संसर्गामुळे अर्थव्यवस्था संकटात सापडली आहे. त्याचाही परिणाम रोजगारावर होत आहे.

अमेरिकेत करोनाच्या संसर्गामुळे अर्थव्यवस्थेवरही परिणाम झाला आहे. त्याच्या परिणामी बेरोजगारीतही वाढ झाली आहे. लाखोंचा रोजगार गेल्यामुळे अमेरिकेच्या राष्ट्राध्यक्षपदाच्या निवडणुकीत बेरोजगारी हा मुख्य मुद्दा होणार असल्याची चिन्ह आहेत. त्यामुळेच निवडणुकीच्या तोंडावर ट्रम्प हे कोणतीही जोखीम पत्करण्यास तयार नाहीत. नोकरीबाबतच्या एच१बीसह अन्य व्हिसा निलंबित करण्याचे आदेश ट्रम्प देणार असल्याची शक्यता मोठ्या प्रमाणावर व्यक्त करण्यात येत होती. या निर्णयामुळे कोणत्याही नवीन एच१ बी व्हिसाधारकाला अमेरिकेत नोकरी करण्यास मनाई असणार आहे. व्हिसा निलंबन करण्याचा निर्णय मागे घेतल्यानंतरच व्हिसाधारकांना नोकरी करता येणार आहे. एच१बी व्हिसा हा अमेरिकेतील कंपन्यांना परदेशातील नागरिकांना नोकरी करण्यास मान्यता देतो. यामध्ये माहिती तंत्रज्ञान क्षेत्रातील कंपन्यांचा मोठा वाटा आहे.

मेरिकेत करोनाच्या संसर्गामुळे उद्भवलेल्या परिस्थितीमुळे लॉकडाउन जाहीर करण्यात आला होता. अर्थव्यवस्था ढासळल्यामुळे अमेरिकेत बेरोजगारीचेही प्रमाण वाढले. दोन महिन्यात अमेरिकेत जवळपास सव्वा दोन कोटी लोक बेरोजगार झाली. अमेरिकेत एप्रिल महिन्यात बेरोजगारीचा दर १४.७ टक्के होता. एच१बी व्हिसा निलंबित केल्यामुळे स्थानिक अमेरिकन युवकांना रोजगार उपलब्ध होईल आणि बेरोजगारी कमी होईल असा ट्रम्प प्रशासनाचा अंदाज आहे.

अमेरिकात आणि चीनमध्येही वाद सुरू असून चीनमधील युवकांना अमेरिकेतील रोजगार गमवावा लागण्याची शक्यता आहे. अमेरिकेने याआधीच चीनवर दबाव तंत्र सुरू केले आहे. व्यापारी कराराच्या मुद्यावरून दोन्ही देशांमध्ये वाद सुरू असतानाच करोना संसर्गाचीही त्यात भर पडली. त्यामुळे आता ट्रम्प यांनी व्हिसा निलंबित करण्याचा निर्णय घेतल्यास भारत आणि चीनमधील युवकांना याचा मोठा फटका बसणार आहे.

Recent Posts