loader
Foto

.... म्हणून चीनने मृत सैनिकांचा आकडा लपवला?

पेईचिंग : लडाखमधील गलवान खोऱ्यात चीनसोबत झालेल्या हिंसक झटापटीमध्ये भारताचे २० जवान शहीद झाले. यात चीनच्या बाजूनेही मोठ्या प्रमाणात जीवितहानी झाल्याची माहिती आहे. पण चीनने अजूनही मृतांचा आकडा जाहीर केलेला नाही. तणाव वाढवायचा नसल्यामुळे आकडा जाहीर करणार नसल्याचं चीनने म्हटलं आहे. पण याबाबतीत एक मोठा खुलासा झाला आहे. अमेरिकेच्या भीतीमुळे चीनने मृत सैनिकांचा आकडा लपवला असल्याची माहिती आहे.

साऊथ चायना मॉर्निंग पोस्टच्या वृत्तानुसार, चीन आणि अमेरिका यांच्यात एक महत्त्वाची बैठक होणार होती. या बैठकीच्या पार्श्वभूमीवर चीनने भारतासोबत घडलेली घटना किरकोळ आहे हे दाखवण्याचा प्रयत्न केला. या धोरणांतर्गत चीनने मृत सैनिकांचा आकडाही जाहीर केला नाही आणि भारतावर आरोप केला. या हिंसक झटापटीत दोन्ही बाजूंनी जीवितहानी झाली आहे, असं सांगतानाच चीन सैन्याच्या प्रवक्त्यांनी मृतांचा आकडा सांगण्यास नकार दिला.

'सैनिकांच्या मृत्यूबद्दल चीन संवेदनशील'
चीनच्या पिपल्स लिबरेशन आर्मीतील सूत्रांच्या मते, चीन आपल्या सैनिकांच्या मृत्यूबद्दल अत्यंत संवेदनशील आहे. सैनिकांच्या मृत्यूचे आकडे चीनचे राष्ट्रपती शी जिनपिंग यांच्या मंजुरीनंतरच समोर येतील. कारण, शी जिनपिंग हेच सैन्याचे अध्यक्ष आहेत आणि सैन्यासाठी त्यांच्याकडूनच प्रत्येक आदेश दिला जातो. चीनचे वरिष्ठ डिप्लोमॅट यांग जिची यांची अमेरिकन परराष्ट्र मंत्री माईक पॉम्पियो यांच्यासोबत बैठक होणार होती. भारता-चीन सीमा वादावर अनेक टप्प्यातील बैठकीतही यांग यांचा समावेश होता.

सीमा वादावर चीनला आहे ही भीती
अमेरिकेसोबतच्या या बैठकीत भारतासोबतच्या संघर्षाचा मुद्दा उचलला जाऊ शकतो, ही भीती चीनला होती. 'चीनला काहीही करुन पॉम्पियो-यांग यांच्या बैठकीअगोदर तणाव कमी करायचा होता. पण एखादा देश या तणावाचा गैरफायदा घेत असेल, तर आमच्या सैनिकांना योग्य ते उत्तर देता येतं, असं चीनच्या लष्करातील एका सूत्राने म्हटलं आहे. गेल्या काही दिवसांपासून पर्वतीय भागात चीनचा युद्ध सराव हा भारतासाठी इशारा होता, असं चीनमधील सैन्य विश्लेषक झोऊ चेनमिंग यांनी म्हटलं आहे.

झोऊ चेनमिंग म्हणाले, 'भारतीय सैनिक म्हणतात की चीनचा आक्रमकपणा आम्ही सहन करणार नाही आणि आम्ही १९६२ चं सैन्य नाही. पण त्यांनी हे विसरू नये की चीनकडेही आता १९६२ सेना नाही. चीनने त्यावेळीही भारताला पराभूत केलं होतं आणि हे पुन्हा केलं जाऊ शकतं.' दरम्यान, पंतप्रधान नरेंद्र मोदी चीनचे राष्ट्राध्यक्ष शी जिनपिंग यांच्यासोबतही बातचीत करण्याची शक्यता आहे. कारण, ते आर्थिक महत्त्व ओळखून आहेत, असंही चीनमधील विश्लेषकांचं मत आहे.

भारत-चीन संघर्षावर अमेरिकेची नजर
संयुक्त राष्ट्रानंतर अमेरिकेनेही आता शांततापूर्ण परिस्थितीत वाद मिटवण्याचं आवाहन केलं आहे. अमेरिकन गृह विभागाने शहीद झालेल्या भारतीय जवानांविषयी सहवेदना व्यक्त केली. भारत आणि चीन यांच्यातील एलएसीवर घटनाक्रमावर अमेरिकेचं लक्ष असल्याचं सांगण्यात आलं आहे.

Recent Posts