loader
Foto

भारत-चीन तणाव: पाकिस्तानमध्ये तिन्ही सैन्य प्रमुखांची बैठक

इस्लामाबाद: भारत आणि चीनमधील सैन्यांमध्ये हिंसाचार झाल्याचे समोर आल्यानंतर पाकिस्ताननेही हालचाली सुरू केल्या आहेत. पाकिस्तानची गुप्तचर संस्था आयएसआयच्या मु्ख्यालयात पाकिस्तानच्या तिन्ही दलाच्या प्रमुखांची बैठक पार पडली. जवळपास दोन वर्षानंतर ही बैठक पार पडली आहे.

पाकिस्तानी लष्कराने दिलेल्या माहितीनुसार, या बैठकीत तिन्ही दलाच्या प्रमुखांमध्ये झालेल्या बैठकीनुसार नियंत्रण रेषा आणि काश्मीरमधील परिस्थितीवर चर्चा करण्यात आली. या बैठकीत पाकिस्तानचे लष्करप्रमुख कमर जावेद बाजवा, नौदल प्रमुख जफर मेहमूद अब्बासी आणि हवाई दल प्रमुख मार्शल मुजाहिद अन्वर खान सहभागी झाले होते. त्याशिवाय पाकिस्तानचे लष्करी अधिकारी आणि आयएसआयचे अधिकारीदेखील सहभागी झाले होते.

राष्ट्रीय सुरक्षेच्या मुद्यावर चर्चा करण्यासाठी आयएसआयच्या मुख्यालयात तिन्ही दलाच्या प्रमुखांनी एकत्र येणे ही दुर्मिळ घटना असल्याचे पाकिस्तानमधील वृत्तपत्र 'डॉन'ने म्हटले आहे. तिन्ही सैन्य दल प्रमुख जॉइंट चीफ ऑफ स्टाफच्या बैठकीत एकत्रित येतात. शेवटची बैठक जुलै २०१८ मध्ये पार पडली होती. अशी बैठक केवळ संकटकाळी, आपात्कालीन स्थितीमध्ये घेण्यात येते.

दरम्यान, पाकिस्तानचे पंतप्रधान इम्रान खान यांना आयएसआयकडून दोनदा सुरक्षा व्यवस्थेबाबतची माहिती देण्यात आली आहे. भारतासोबत तणाव वाढत असताना ही बैठक झाल्यामुळे या बैठकीला महत्त्व असल्याचे 'डॉन'ने म्हटले आहे. दहशतवाद्यांवरील कारवाईच्या नावावर भारत हल्ला करू शकतो अशी पाकिस्तानला भीती आहे. तर, भारताला सूचक इशारा देण्यासाठी ही बैठक पार पडली असल्याचे पाकिस्तानमधील राजकीय रणनितीकारांनी सांगितले. आगामी काही दिवसांमध्ये पाकिस्तानचे परराष्ट्र मंत्री शाह महमूद कुरेशी चीनच्या परराष्ट्र मंत्र्यांची भेट घेणार असल्याचेही 'डॉन'ने वृत्त दिले आहे.

Recent Posts