loader
Foto

मास्कच्या वापरानंतरही करोना विषाणूंचा शरीरावर हल्ला!

लंडन: करोनाच्या संसर्गापासून वाचण्यासाठी जगभरात मास्क आणि फेसशिल्डचा वापर करण्याबाबतचा आग्रह केला जात आहे. मात्र, मास्कचा वापर आणि तीन फूटांचे सोशल डिस्टेंसिंगचा पर्याय अंमलात आणल्यानंतरदेखील करोनाचा संसर्ग होण्याचा धोका असल्याचा इशारा संशोधकांनी दिला आहे.

सायप्रसमधील युनिर्व्हसिटी ऑफ निकोसियाच्या वैज्ञानिकांनी केलेला दावा धक्कादायक आहे. मास्क घातल्यानंतरही किमान ६ फूटांचे अंतर ठेवणे आवश्यक असल्याचे संशोधकांनी सांगितले. संशोधक दिमित्रस डिकाकिस यांनी सांगितले की, मास्कच्या वापरामुळे करोनाचा संसर्ग रोखता येणार नाही. काही ड्रॉपलेट मास्क शील्डच्या आतमध्ये शिरू शकतात. इतकंच नव्हे तर रुग्णाचे ड्रॉपलेट ४ फूटापर्यंत उडू शकतात, असेही त्यांनी सांगितले. करोनाबाधित जर सातत्याने खोकत असेल तर मास्कच्या वापराचा काहीही उपयोग होणार नसल्याचेही त्यांनी सांगितले.

जगभरातील अनेक देशांमध्ये लॉकडाउनचे निर्बंध शिथिल करण्यात आले आहे. काही ठिकाणी सोशल डिस्टेंसिंगच्या नियमात शिथिलता देण्यासाठी उद्योजकांकडून सरकारकडून दबाव टाकण्यात येत असताना हे संशोधन समोर आले आहे. करोनाचा संसर्ग फैलावण्याचा वेग कमी करण्यासाठी आणि प्रसार रोखण्यासाठी मास्क आणि फेसशिल्डचा वापर करण्याचे निर्देश देण्यात आले आहेत.

दरम्यान, जगभरात सुरू असलेल्या करोनाच्या थैमानाला अटकाव करण्यासाठी अनेक प्रयत्न सुरू आहेत. करोनाच्या आजारावर मात करण्यासाठी अनेक देशांमध्ये लसींवर, औषधांवर संशोधन सुरू असून या प्रयत्नांना यश मिळत असल्याचे चित्र आहे. ब्रिटनमध्ये सर्वात स्वस्त असलेल्या लसीची चाचणी करण्यात येणार आहे. तर, अमेरिका आणि चीनमधूनही चांगली बातमी समोर आली आहे. अमेरिकेतील मॉडर्ना कंपनीने विकसित केलेल्या लसीच्या चाचणीचा तिसरा टप्पा जुलै महिन्यात सुरू होणार आहे. तर, चीनमधील सिनोवॅक बायोटेक कंपनीने लस चाचणी यशस्वी झाली असल्याचा दावा केला आहे. ही लस सुरक्षित असून कोणतेही दुष्परिणाम दिसून आले नाहीत. ही लस दिल्यानंतर १४ दिवसांमध्ये करोनाच्या विषाणूंचा खात्मा करणाऱ्या अॅण्टीबॉडीजची निर्मिती शरीरात होते.

Recent Posts