loader
Foto

भारताचंही प्रत्युत्तर; चीनच्या ५ सैनिकांचा मृत्यू, ११ जखमी

बीजिंग : लडाख सीमेवर झालेल्या झटापटीत एक भारतीय सैन्य अधिकारी आणि दोन जवान शहीद झाले. भारताच्या प्रत्युत्तरातही चीनचे ५ जवान शहीद झाले असून ११ जण जखमी झाल्याची माहिती चीनच्या माध्यमांनी दिली आहे. चीनचं वृत्तपत्र ग्लोबल टाइम्सच्या रिपोर्टर वँग वेनवेन यांनी दिलेल्या वृत्तानुसार, पिपल्स लिबरेशन आर्मीचे ५ जवान मारले गेले असून ११ जण जखमी झाले आहेत. दुसरीकडे भारतीय सैन्यानेही या घटनेची गांभीर्याने दखल घेतली आहे. लष्कर प्रमुख मनोज नरवणे यांनी पठाणकोट दौरा रद्द केला आहे.

भारतीय बाजूकडूनच चीनच्या हद्दीत घुसखोरी करण्यात आली होती, असा आरोप चीनकडून करण्यात आला आहे. तर भारतीय सैन्याने दिलेल्या माहितीनुसार, सोमवारी रात्री ही झटापट झाली. या झटापटीत गोळीबार झाला नसून दगडफेक झाल्याची माहिती आहे. गलवान खोऱ्यात तणाव निवळण्याची प्रक्रिया सुरू असतानाच चीन आणि भारतीय सैन्यात हिंसक झटापट झाली. यात भारतीय सैन्याचा एक अधिकारी आणि दोन जवान शहीद झाले, असं अधिकृत वक्तव्य भारतीय सैन्याकडून जारी करण्यात आलं आहे.

चीनच्या हल्ल्यात एक भारतीय सैन्य अधिकारी आणि दोन जवान शहीद झाल्यानंतर दिल्लीत हालचाली वाढल्या आहेत. तणाव निवळण्यासाठी प्रयत्न सुरू असतानाच हा प्रकार घडल्यामुळे दिल्लीतही घडामोडी वाढल्या आहेत. संरक्षण मंत्री राजनाथ सिंह यांनी परराष्ट्र मंत्री एस. जयशंकर, चिफ ऑफ डिफेन्स स्टाफ जनरल बिपिन रावत, वायू सेना, लष्कर आणि नौदल प्रमुख या सर्वांची बैठक बोलावली आहे. चीन आणि भारत या दोन्ही बाजूने तणाव निवळण्यासाठी सकारात्मक दिशेने प्रयत्न सुरू असल्याचं लष्कर प्रमुख जनरल मनोज नरवणे यांनी म्हटलं होतं. त्याच्या दुसऱ्याच दिवशी हा प्रकार समोर आला आहे. यापूर्वी १९६७ ला चीनच्या हल्ल्यात भारतीय जवान शहीद झाले होते. त्यानंतर पहिल्यांदाच हा प्रकार घडला आहे.

भारतीय सैनिकांवर हल्ला करणाऱ्या चीनने उलट्या बोंबा सुरू केल्या आहेत. भारतीय सैनिकांनी चीनच्या हद्दीत प्रवेश करुन चीनच्या सैनिकांवर हल्ला केला असल्याचा आरोप चीनकडून करण्यात आला आहे. भारतीय सीमेवर झालेल्या या हल्ल्याविषयी कोणतीही माहिती नाही, अशी प्रतिक्रिया चीनच्या परराष्ट्र मंत्रालयाचे प्रवक्ते झाओ लिजिन यांनी दिली. भारत आणि चीन संवादातून तणाव निवळणार असल्याचं चीनच्या परराष्ट्र मंत्र्यांनी म्हटलं आहे.

Recent Posts