loader
Foto

चीन आणखी एका बेटावर उभारणार सैनिकी तळ!

मनिला: लडाखमधील भारताच्या भूभागावर ताबा सांगणाऱ्या चीनने आता दक्षिण चीन समुद्रात आपले वर्चस्व ठेवण्यासाठी कंबर कसली आहे. दक्षिण चीन समुद्रावर वर्चस्व गाजवण्यासाठी चीनने फिलीपाईन्स जवळील स्कारबोरोघ शोअल बेटावर हवाई आणि नौदलासाठी तळ उभारण्याचे प्रयत्न सुरू केले आहेत. सामरीकदृष्ट्या दक्षिण चीन समुद्राचे मोठे महत्त्व आहे. चीनने आणि शेजारील देशांमध्ये यावरून वाद सुरू आहेत.

अमेरिकन वृत्तवाहिनी सीएनएनने न्या. (निवृत्त) अॅण्टोनियो कार्पियो यांच्या हवाल्याने सांगितले की, चीन लवकरच शोअल बेटावर हवाई आणि नौदलासाठी तळ उभारत आहे. चीनने एअर डिफेन्स डिटेक्शन झोन तयार करण्याबाबत संकेत दिले आहेत. त्याचा एकच अर्थ असून चीन लवकरच शोअल बेटावर आपला सैनिकी तळ उभारणार आहे, असे कार्पियो यांनी सांगितले. फिलीपाईन्सनला २०१२ मध्ये या बेटावरील आपला ताबा गमवावा लागला होता. त्यानंतर चीनविरोधात फिलीपाईन्सने आंतरराष्ट्रीय कोर्टात धाव घेतली होती. हे बेट फिलीपाईन्सच्या समु्द्री हद्दीत आहे. कोर्टाने २०० मैल अंतरापर्यंत फिलीपाईन्सचा दावा मान्य केला. मात्र, कोर्टाने या बेटावर कोणत्याही मान्य केला नाही. फिलीपाईन्सशिवाय चीन आणि तैवान यांनीदेखील या बेटावर दावा केला आहे. चीनच्या दक्षिण चीन समुद्रावरील वाढत्या वर्चस्वाला इतर देशांचा विरोध असून तैवानच्या बाजूने अमेरिकन नौदल उभे ठाकले आहे. त्यामुळे चीनच्या या प्रयत्नामुळे अमेरिका आणि चीनमधील संबंध आणखी ताणणार असल्याची चर्चा आहे.

साऊथ मॉर्निंग पोस्टने दिलेल्या वृत्तानुसार, चीनचे लष्कर लवकर दक्षिण चीन समुद्रात एअर डिफेन्स आयडेंटिफिकेशन झोन उभारण्यासाठी प्रयत्न करत आहे. चीन या झोनमध्ये प्रतास, पार्सेल आणि स्पार्टले बेटांचा समावेश करणार आहे. या बेटाच्या हक्कावरून तैवान, व्हिएतनाम आणि मलेशियासोबत चीनचा वाद आहे. मागील १० वर्षांपासून चीन एअर डिफेन्स यंत्रणा उभी करण्याचा विचार करत आहे. सध्या करोनाच्या संसर्गाशी दोन हात करण्यात अनेक देश गुंतले असताना चीन या संधीचा फायदा घेण्याच्या प्रयत्नात आहे.

Recent Posts