loader
Foto

अंडरवर्ल्ड डॉन दाऊद इब्राहिमला करोनाची बाधा; रुग्णालयात दाखल

इस्लामाबाद: अंडरवर्ल्ड डॉन आणि मुंबई बॉम्बस्फोट प्रकरणातील आरोपी दाऊद इब्राहिम याला करोनाची बाधा झाली आहे. दाऊदला उपचारासाठी रुग्णालयात दाखल करण्यात आले आहे. त्याशिवाय दाऊदची पत्नी महजबीनमध्येही करोना आजाराची लक्षणे आढळून आल्यामुळे तिलाही रुग्णालयात दाखल केले आहे. दाऊदला लष्करी रुग्णालयात दाखल करण्यात आले आहे.

एका वृत्त संकेतस्थळाने हा दावा केला आहे. दाऊद आणि त्याच्या पत्नीला लष्करी रुग्णालयात विलगीकरणात ठेवण्यात आले असल्याची माहिती आहे. या दोघांच्याही उपचारावर पाकिस्तानची गुप्तचर संस्था आयएसआयची देखरेख आहे. त्यामुळे या रुग्णालयात सुरक्षा व्यवस्था कडक करण्यात आली आहे. पाकिस्तानमध्ये करोनाबाधितांची संख्या वेगाने वाढत आहे. मागील २४ तासांत पाकिस्तानमध्ये ४८०० हून बाधित आढळले आहेत. पाकिस्तानमध्ये सध्या ८९ हजारांहून अधिक करोनाबाधित आहेत. पाकिस्तानमध्ये आतापर्यंत १८३८ जणांचा करोनाच्या संसर्गाने मृत्यू झाला आहे.

मुंबई बॉम्बस्फोटप्रकरणी दाऊद इब्राहिम आणि टायगर मेमन हे आरोपी असून दोघेही फरार आहेत. दाऊस पाकिस्तानमध्ये वास्तव्यास असल्याचे अनेक पुरावे भारताने पाकिस्तानला दिले आहेत. मात्र, पाकिस्तानने दाऊद पाकिस्तानमध्ये नसल्याचे सांगितले आहे. भारतातून पळून गेल्यानंतर दाऊदने अनेक वर्षे दुबईत ठाण मांडले होते. भारतीय गुप्तचर संस्थेने त्याच्यविरोधात कारवाईचे पाश आवळण्यास सुरुवात केली होती. त्यानंतर दाऊदने आयएसआयच्या मदतीने पाकिस्तानमध्ये पळ काढला. पाकिस्तानमधील अनेक व्यवसाय दाऊदच्या मालकीचे असल्याची चर्चा आहे. गुन्हेगारी विश्वातून कमावलेला काळा पैसा दाऊदने पाकिस्तानमधील उद्योग व्यवसायात गुंतवला असल्याची चर्चा आहे.

Recent Posts