loader
Foto

अमेरिकेकडून जिनपिंग यांच्या 'या' स्वप्नाला सुरुंग

लंडन: ५जी आणि ६ जी तंत्रज्ञानाच्या मदतीने आगामी १० वर्षात डिजीटल जगावर राज्य करण्याचे चीनच्या स्वप्नांना मोठा झटका बसला आहे. आक्रमक विस्तारवादी धोरणांमुळे चीनविरोधात जगभरात रोष निर्माण होत आहे. डिजीटल जगावर अधिराज्य गाजवण्याचे स्वप्न पाहणाऱ्या चीनला अत्याधुनिक सेमीकंडक्टरचा तुटवडा जाणवत आहे. अमेरिका आणि त्याच्या मित्र देशांनी सेमीकंडक्टरच्या कच्चा माल चीनला देण्यास नकार दिला आहे.

चीनने ५ जीच्या तंत्रज्ञानावर पकड मिळवली असली तरी त्यासाठी आवश्यक असणाऱ्या अत्याधुनिक सेमीकंडक्टरसाठी अमेरिकेवर अवलंबून रहावे लागत आहे. मागील काही वर्षांपासून चीन सेमीकंडक्टरची निर्मिती करू इच्छितो. मात्र, अद्याप त्यांना यश मिळाले नाही. 'मेड इन चायना' सेमीकंडक्टरमध्ये अनेक तांत्रिक कमतरता आहेत. त्यामुळे इतर देशांवर चीनला अवलंबून रहावे लागत आहे.

ब्रिटनमधील 'टेलिग्राफ'ने दिलेल्या वृत्तानुसार, या चिपशिवाय आणि त्याच्याशी निगडीत असलेल्या साधनांशिवाय चीन जगात ५ जी तंत्रज्ञानावर वर्चस्व निर्माण करू शकत नाही. इतकंच नव्हे तर दूरसंचार तंत्रज्ञान आणि आर्टिफिशल इंटेलिजेंसच्या क्षेत्रात आघाडी घेऊ शकत नाही. वर्ष २०३० पर्यंत इंटरनेट आणि त्याच्याशी निगडीत बाबींवर नियंत्रण आणण्याचे नियोजन चीनचे राष्ट्राध्यक्ष शी जिनपिंग यांनी केले होते.

 

शी जिनपिंग यांच्या या महत्त्वाकांक्षी स्वप्नाला अमेरिकेने सुरुंग लावला आहे. अमेरिकेने मागील महिन्यात चीनला झटका दिला. चीप निर्मिती करणारी जगातील सर्वात मोठी कंपनी तैवानच्या टीएसएमसीने चीनच्या हुवाई कंपनीकडून ऑर्डर घेणे बंद केले आहे. त्यामुळे हुवाई कंपनीला मोठा झटका बसला आहे. हुवाई कंपनी ही चीनची सर्वात महत्त्वाची कंपनी आहे.

तैवानच्या या कंपनीला हुवाईकडून मोठी मागणी होती. हुवाई ही जगातील सर्वात मोठी टेलिकॉम उपकरण निर्मिती करणारी आणि दुसरी मोठी स्मार्टफोन निर्मिती करणारी कंपनी आहे. हुवाई चीपसाठी पूर्णपणे तैवानवर अवलंबून होती. हुवाईच्या अनेक चांगल्या फोनमध्ये याच तैवानच्या कंपन्यांचे चीप लागलेले आहेत. अमेरिकेच्या निर्बंधानंतर हुवाई तैवानी कंपनीच्या मदतीने काम करत होती. आता, तैवानच्या कंपनीने हुवाईला चीप पुरवठा करणे बंद केले असल्यामुळे अडचणी वाढल्या आहेत.

Recent Posts