loader
Foto

कुलींच्या कामाचेही खासगीकरण?

नागपूर: कुलींच्या कामाचेही खासगीकरण करण्याची भीती असणारी सुविधा नागपूर रेल्वे स्थानकावर सुरू होणार असल्याने कुलींमध्ये अस्वस्थता असून, 'आमचेही काम रेल्वे प्रशासनच करणार असेल, तर आम्ही काय उचलायचे,' असा सवाल नागपूर स्थानकावरील भारवाहकांनी (कुली) केला आहे. नागपूर विभागाने अलीकडेच एका खासगी कंपनीशी करार केला आहे. या करारानुसार प्रवाशांचे सामान त्यांच्या घरून नेण्यापासून तर जाणार असलेल्या ठिकाणी पोहोचवून देण्यापर्यंतची कामे कंपनीचे कर्मचारी करणार आहेत. प्रवाशांसाठी अभिनव योजना म्हणून या सुविधेची जाहिरात करण्यात येत आहे. मात्र यामुळे कुलींचे आयुष्यच संकटात येईल, असे कुलींना वाटते. आधीच ट्रॉली बॅगने कुलींचा व्यवसाय अर्ध्यावर आला आहे. आजकाल बहुतेक बॅगना खाली चाके असतात. आधी अशा बॅग, पेट्या कुली डोक्यावर वाहून न्यायचे, मात्र चाके असलेली बॅग गाडीपर्यंत सहज ओढत नेता येते. वृद्ध प्रवाशांना कुली खांद्यावर बसवून घेऊन जात. मात्र, आता स्टेशनवर बॅटरी कार आल्याने कुलींचे तेही काम बंद झाले. अशा परिस्थितीत आता खासगी कंपनीशी करार करून प्रवाशांचे सामान त्यांच्या घरूनच उचलणे हे कुलींविरुद्धचे षडयंत्र असल्याचे कुलींना वाटत आहे. कारण, प्रवाशी रिकाम्या हाताने स्टेशनवर आले तर कुलींना काम मिळणार नाही, अशी भीती त्यांना आहे.

त्यामुळेच नागपूर स्थानकावरील कुलींनी बैठक घेऊन या सुविधेविषयी नाराजी व्यक्त केली. या सुविधेुमळे कुलींच्या हक्कांवर गदा आली आहे, असा आरोप करून 'सरकार...मायबाप...आमच्या तोंडचा घास हिरावू नका,' अशी विनंती रेल्वे प्रशासनाला करण्यात आली. 'ओझे वाहून नेण्याचा अधिकार आमचा आहे. आमची जागा कोणी घेत असेल तर कामबंद आंदोलन करू,' असा इशारा मध्य रेल्वे भारवाहक संघटनेचे अध्यक्ष अब्दुल मजीद यांनी दिला.

प्रवासादरम्यान सामान ही एक मोठी समस्या असते. सामान घरापासून ते स्टेशन आणि स्टेशन ते गाडीपर्यंत व्यवस्थित घेऊन जाणे, हा मोठा प्रश्न असतो. प्रवाशांना सोयीचे व्हावे म्हणून रेल्वे प्रशासनाने हा करार केला आहे. दुसरे असे की प्रवासात अनेकदा बॅग चोरीला जातात. या करारानुसार प्रवाशाची बॅग सुरक्षित पोहचविण्याची जबाबदारी संबंधित कंपनीची असणार आहे. त्यासाठी बॅगचा विमा काढण्यात येणार आहे. त्यामुळे प्रवाशांनी या सुविधेबद्दल आनंद व्यक्त केला आहे. मात्र त्यामुळे कुलींचा रोजगार जाण्याची भीती आहे.

Recent Posts