loader
Foto

तर उपराजधानीत ‘द बर्डस्’ची निर्मिती

नागपूर : भारतीय वायुसेनेत दाखल झालेल्या अत्याधुनिक लढाऊ राफेल विमानांची जगभरात चर्चा सुरू आहे. असे असताना देशाने नव्याने ऑर्डर दिल्यास नजीकच्या भविष्यात 'द बर्डस्'ची निर्मिती उपराजधानी होण्याची दाट शक्यता आहे.

केंद्रातील मोदी सरकारने फ्रान्सकडून राफेलची खरेदी केली. काँग्रेसप्रणीत संयुक्त पुरोगामी आघाडीच्या काळात १२५ विमाने खरेदी करण्याचा करार झाला होता. नंतर मोदी सरकारने ३६ विमानांचा करार केला. राफेल करार व किंमतीवरून काँग्रेससह विरोधी पक्षांनी देशव्यापी आंदोलन केले होते. दोन दिवसांपूर्वी पाच राफेल विमाने देशात येताच भाजपकडून जल्लोष करण्यात आला.

भारताच्या करारानुसार सर्व विमाने फ्रान्सहून येतील. देशाची गरज आणि यापूर्वी करण्यात आलेला करार भविष्यात विमानांची मागणी होऊ शकते. त्यामुळे यापुढील ऑर्डरची पूर्तता नागपुरातून होण्याची दाट शक्यता या क्षेत्राशी संबंधित सूत्रांनी व्यक्त केली. नागपुरातील प्रकल्पाचे अजूनही काम सुरू आहे. हा प्रकल्प पूर्ण झाल्यानंतर लढाऊ विमाने, हेलिकॉप्टर व सुट्या भागांच्या उत्पादनाला वेग येईल. सद्यस्थितीत नागपुरात फाल्कन विमान तयार होत असून डिसेंबर २०२२ पर्यंत येथून संपूर्ण विमानाने उड्डाण घ्यावे, असे कंपनीचे प्रयत्न असल्याचे सूत्रांनी सांगितले.

 

केंद्रीय मंत्री नितीन गडकरी व तत्कालीन मुख्यमंत्री देवेंद्र फडणवीस यांच्या पुढाकाराने नागपूर परिसरात डिफेन्स हब तयार करण्याचे प्रयत्न झाले. मिहान प्रकल्पात उद्योगपती अनिल अंबानी यांच्या 'डीआरएएल'ची जमीन देण्यात आली. सुमारे ६ हजार कोटी रुपयांच्या या प्रकल्पात आतापर्यंत अडीच हजार कोटी रुपयांहून अधिक गुंतवणूक झाली आहे. दीड वर्षापूर्वी ९ फेब्रुवारीला अनिल अंबानी यांच्या पत्नी टीना व कंपनीच्या अन्य अधिकाऱ्यांनी प्रकल्पाची पाहणी केली. या प्रकल्पात सुमारे दीडशे अधिकारी व तंत्रज्ञ आहेत.

ढांचा व डोअर
सर्वत्र चर्चेत असणाऱ्या राफेलची निर्मिती करणाऱ्या दसॉल्टचा प्रकल्प नागपुरात सुरू आहे. उपराजधानीच्या मिहान प्रकल्पातील धीरुभाई अंबानी एअरोस्पेस पार्कमधील ६० एकरमध्ये 'दसॉल्ट-अंबानी एअरोस्पेस लिमिटेड कंपनी'त राफेलच्या सुट्या भागांचे उत्पादन सुरू झाले. कॉकपिटसह विमानाच्या ढांच्याचा अर्धा भाग सद्यस्थितीत येथे तयार करून निर्यात केला जातो. विमानाच्या इंजिनचे अभेद्य सुरक्षा कवच असणारे 'डोअर' येथे तयार करण्यात येत आहे. भारतात आलेल्या विमानांना नागपुरातील कवच असण्याची शक्यता नाकारता येत नसल्याचे सूत्रांनी सांगितले.

Recent Posts