loader
Foto

भारतात न जाण्याचा अमेरिकेचा नागरिकांना सल्ला; पाकिस्तान, सीरियाच्या श्रेणीत समावेश

भारतासोबत चांगली घट्ट मैत्री असल्याचा दावा करणाऱ्या अमेरिकेने आपल्या नागरिकांना भारतात न जाण्याचा सल्ला दिला आहे. करोनाचे वाढते संकट, गुन्हेगारी आणि दहशतवादामुळे भारतात प्रवास न करण्याचा अमेरिकेने आपल्या नागरिकांना म्हटले. धक्कादायक म्हणजे अमेरिकेने भारताला सीरिया, पाकिस्तान, इराक, येमेन या देशांच्या श्रेणीत स्थान दिले आहे.

अमेरिकेने भारताला चार इतकी रेटिंग दिली आहे. ही रेटिंग वाईट असल्याचे म्हटले जाते. अमेरिकेने सांगितले की, भारतात करोनाचे संकट आहे. त्याशिवाय देशात गु्न्हेगारीच्या घटना आणि दहशतवादी घटनांमध्ये वाढ झाली आहे. त्यामुळे अमेरिकन नागरिकांनी भारतात प्रवास करू नये अशी सूचना देण्यात आली आहे. अमेरिकेने दिलेल्या मार्गदर्शक तत्वांमध्ये काही ठिकाणी महिलांवरील वाढत्या अत्याचाराचेही कारण दिले आहे. तर, इंडियन टूरिझम अॅण्ड हॉस्पिटलटी संघाने (FAITH) केंद्र सरकारकडे ही ट्रॅव्हल अॅडव्हायझरी बदलण्यासाठी अमेरिकेवर दबाव टाकावा अशी विनंती केली आहे.

FAITH ने सांगितले की, भारत सरकारने या विषयाला प्राथमिकता देऊन या सूचनांमध्ये बदल करण्यास सांगितले पाहिजे. यामुळे भारताबद्दल नकारात्मक प्रतिमा तयार होत आहे. करोनाच्या महासाथीमुळे आधीच पर्यटन व्यवसायाला मोठा फटका बसला आहे. भारतात पुन्हा एकदा पर्यटन व्यवसाय सुरू होण्याच्या मार्गावर आहे. अशातच अमेरिकेने नागरिकांना दिलेल्या अॅडव्हायझरीमुळे पर्यटन व्यवसायाला आणखी फटका बसणार असल्याची भीती व्यक्त करण्यात येत आहे. पाकिस्तान, येमेन, सीरियासारख्या देशांच्या श्रेणीत भारताचा समावेश करणे म्हणजे भारतासाठी ही वाईट घटना असल्याचे FAITHने म्हटले आहे.

भारतात पर्यटनासाठी अमेरिकन नागरिकांची पसंती असते. इतकेच नव्हे तर भारतात येणारे अमेरिकन पर्यटक हे इतर देशांच्या तुलनेने अधिक काळ भारतात वास्तव्य करत आहेत. अमेरिकन पर्यटक भारतात सरासरी २९ दिवस वास्तव्य करतात. तर, इतर देशांचे पर्यटक २२ दिवस वास्तव्य करतात. अमेरिकेच्या ट्रॅव्हल अॅडव्हायझरीमध्ये बदल झाल्यास भारतातील पर्यटनाबाबत अधिक चांगले वातावरण निर्माण होईल असा विश्वास FAITH ने व्यक्त केला आहे. अमेरिकेच्या परराष्ट्र विभागाने जम्मू-काश्मीर आणि भारत-पाकिस्तानच्या सीमेलगतच्या भागात न जाण्याची सूचना नागरिकांना दिली आहे.

Recent Posts