loader
Foto

अमेरिकेचा चीनला आणखी एक झटका; घेतला 'हा' निर्णय

अमेरिकेकडून चीनची कोंडी करण्याचे प्रयत्न सुरू आहेत. चीनने हाँगकाँगमध्ये सुरक्षा कायदा लागू केल्यानंतर अमेरिका चीनवर आणखीच नाराज झाला होता. व्यापार करार, करोना संसर्गानंतर हाँगकाँगच्या मुद्याने अमेरिका-चीनच्या संबंधाच्या तणावात भर घातली आहे. अमेरिकेने चीनला आता आणखी झटका दिला असून हाँगकाँगशी संबंधित तीन द्विपक्षीय करार रद्द केले आहेत.

हाँगकाँगमध्ये सुरक्षा कायदा लागू करणे हे चीनकडून हाँगकाँगच्या स्वायत्तेवर हल्ला असल्याचा आरोप स्थानिकांसह अमेरिकेनेही केला होता. हाँगकाँगमध्ये हा कायदा लागू केल्यास त्याचे परिणाम चांगले होणार नसल्याचा इशारा अमेरिकेने दिला होता. बुधवारी, ट्रम्प प्रशासनाने हाँगकाँगसोबतचे तीन द्विपक्षीय करार स्थगित, रद्द केले आहेत. चीनने आशियाच्या ट्रेडिंग हबची स्वायत्ता आणि लोकशाही स्वातंत्र्यावर घाला घालण्यासाठी हा सुरक्षा कायदा थोपवला असल्याचा आरोप अमेरिकेने केला आहे.

एक महिन्यापूर्वी राष्ट्राध्यक्ष डोनाल्ड ट्रम्प यांनी अमेरिकेने हाँगकाँगला दिलेला विशेष दर्जा मागे घेतला होता. त्याशिवाय, हाँगकाँगमध्ये लोकशाहीसाठी लढणाऱ्या राजकीय कार्यकर्त्यांवर कारवाई करणाऱ्या अधिकाऱ्यांवर अमेरिकेतील प्रवेशावर निर्बंध लागू केले. परराष्ट्र खात्याच्या प्रवक्त्या मॉर्गन ऑर्टागस यांनी सांगितले की, आम्ही तीन द्विपक्षीय करार स्थगित, रद्द करणार आहोत. याबाबत हाँगकाँगच्या अधिकाऱ्यांना १९ ऑगस्ट रोजी माहिती देण्यात आली आहे. या तीन करारांमध्ये गुन्हेगार, आरोपींचे प्रत्यार्पण, दोषींचे स्थानांतरण आणि जहाजांच्या आतंरराष्ट्रीय वाहतुकीतून मिळणाऱ्या उत्पन्नाक परस्परांना सवलत देणे आदी करारांचा समावेश आहे.

हाँगकाँगमधील नागरिकांना स्वायत्ता देण्याबाबत चीनने चीन-ब्रिटीश संयुक्त जाहीरनाम्याद्वारे वचन दिले होते. चीनच्या कम्युनिस्ट पक्षाने हाँगकाँगची स्वायत्ता संपवण्यासाठी कठोर पावले उचलली असल्याचा आरोप मॉर्गन ऑर्टागस यांनी केला.

अमेरिका हाँगकाँगला एक देश, एक व्यवस्था म्हणून स्वीकारणार असल्याचे अमेरिकेने स्पष्ट केले आहे. हाँगकाँगमधील नागरिकांचे स्वातंत्र्य पायदळी तुडवणाऱ्यांवर कारवाई करण्यात येणार असल्याचे अमेरिकेने स्पष्ट केले.

दरम्यान, हाँगकाँगमध्ये नवीन सुरक्षा कायदा लागू करण्यास स्थानिक लोकशाहीवादी कार्यकर्त्यांचा विरोध आहे. या कायद्याविरोधात अनेक तीव्र आंदोलनेही झाली आहेत. चीनच्या संसदेने या विधेयकाला मंजुरी दिल्यास हाँगकाँगला देण्यात आलेला विशेष आर्थिक दर्जा रद्द करण्याची धमकी अमेरिकेने दिली होती. त्याशिवाय इतरही निर्बंध लादणार असल्याची शक्यता वर्तवण्यात येत आहे. मात्र, अमेरिकेने हा दर्जा काढल्यास अमेरिकेलाही मोठे नुकसान होणार असल्याचा इशारा हाँगकाँगमधील सरकारने दिला आहे. हे निर्बंध दुधारी तलवारीसारखे असल्याचेही काही दोन महिन्यांपूर्वी म्हटले होते.

Recent Posts