loader
Foto

डोनाल्ड ट्रम्प यांच्याही पोस्ट डिलीट करणार; फेसबुकचा इशारा

नोव्हेंबर महिन्यात होणाऱ्या अमेरिकन राष्ट्राध्यक्षपदाच्या निवडणुकीच्या प्रचाराला सुरुवात झाली आहे. सोशल मीडियावरून होणाऱ्या प्रचारावर लक्ष ठेवण्यासाठी फेसबुकनेही कंबर कसली आहे. फेसबुकवर फेक न्यूज, द्वेष पसरवणाऱ्या पोस्टवर कारवाई करण्यात येणार आहे. अमेरिकेचे राष्ट्राध्यक्ष डोनाल्ड ट्रम्प यांच्याही अकाउंटवरून अशा पोस्ट आल्यास कारवाई होणार असल्याचे फेसबुकच्या मुख्य परिचालन अधिकारी शेरिल सँडबर्ग यांनी स्पष्ट केले.

तीन नोव्हेंबर रोजी होणाऱ्या अमेरिकन राष्ट्राध्यक्षपदाच्या निवडणुकीच्या पार्श्वभूमीवर फेसबुकवरून होणाऱ्या अपप्रचाराला आळा घालण्यासाठी पावले उचलण्यास सुरुवात केली आहे. यामध्ये सँडबर्ग यांनी सांगितले की,फेसबुक आपल्या सोशल मीडिया प्लॅटफॉर्मवरून फेक न्यूज, द्वेष पसरवणाऱ्या माहितीची पोस्ट डिलीट करणार आहे. मग, ती पोस्ट ट्रम्प यांनी टाकली तरी त्याच्यावर कारवाई होणार.

सँडबर्ग यांनी सांगितले की, फेसबुकने आगामी राष्ट्राध्यक्ष निवडणुकीच्या पार्श्वभूमीवर फेक न्यूज, दिशाभूल करणारी माहिती रोखण्यासाठी नवीन सेवाही सुरू केली आहे. यामध्ये निवडणुकीच्या संबंधात असलेल्या पोस्टची सत्यता पडताळून पाहण्याबाबतची सूचना असणार आहे.

फेसबुक कंपनीबाहेरील एका एजन्सीद्वारे पोस्टची सत्यता पडताळून पाहणार आहे. फेसबुकच्या नियमांचे उल्लंघन होत असलेल्या पोस्टवर लक्ष ठेवण्यात येणार आहे. सध्या फेसबुकवरील १२ आणि इन्स्टाग्रामवर १० प्रकारच्या नियमांचे उल्लंघन होते का, यावर लक्ष ठेवण्यात येत आहे. यामध्ये ऑनलाइन धमकी देणे, त्रास देणे, द्वेष पसरवणे, दहशतवादी कृत्यांमध्ये सहभागी होणे, हिंसेला चिथावणी, हिंसक भाषेचा वापर करणे आदींचा समावेश आहे.

दरम्यान, अमेरिकेचे राष्ट्राध्यक्ष डोनाल्ड ट्रम्प पुन्हा एकदा फेसबुक आणि ट्विटरच्या निशाण्यावर आलेले. या दोन्ही सोशल मीडिया प्लॅटफॉर्मवरून डोनाल्ड ट्रम्प यांनी केलेल्या पोस्ट डिलीट करण्यात आल्या आहेत. करोना व्हायरसचा परिणाम लहान मुलांवर होत नसल्याचा दावा केला होता. फेसबुककडून पहिल्यांदाच डोनाल्ड ट्रम्प यांच्या करोनाबाबतच्या पोस्टवर कारवाई करण्यात आली. ट्रम्प यांनी पोस्ट केलेला व्हिडिओ खोटे दावे करत असून त्यामध्ये कोणत्याही प्रकारचे तथ्य नाही. कोणत्याही व्यक्तीमध्ये करोनाशी पूर्णपणे लढण्याची क्षमता विकसित झाली नाही. त्यामुळे हा व्हिडिओ आमच्या नियमांविरोधात असल्यामुळे व्हिडिओ हटवला असल्याची माहिती फेसबुकच्या प्रवक्त्यांनी दिली.

याआधीही ट्रम्प यांच्या मुलाच्या ट्विटवर ट्विटरने कारवाई केली होती. अमेरिकेचे राष्ट्राध्यक्ष डोनाल्ड ट्रम्प सातत्याने करोनाच्या आजारावर हायड्रोक्सीक्लोरोक्विन औषध प्रभावी असल्याचा दावा करतात. डोनाल्ड ट्रम्प यांच्या मुलानेही हायड्रोक्सीक्लोरोक्विन औषध प्रभावी असल्याचे ट्विट केल्यानंतर ट्विटरने कारवाई केली होती. ट्रम्प ज्युनिअर यांनी ट्विट केलेला व्हिडिओ हा कोविड-१९ बाबत चुकीची माहिती देण्याबाबतच्या नियमांचे उल्लंघन केले असल्याचे ट्विटरने म्हटले होते.

Recent Posts