loader
Foto

शी जिनपिंग पाकिस्तान दौऱ्यावर जाणार; भारताची चिंता वाढणार!

बीजिंग: लडाखमध्ये चीनसोबत सुरू असलेल्या तणावाच्या पार्श्वभूमीवर भारताची चिंता आता आणखी वाढणार असल्याची चिन्हे आहेत. चीनचे राष्ट्रपती शी जिनपिंग लवकरच पाकिस्तानच्या दौऱ्यावर जाणार आहेत. या दौऱ्यात दोन्ही देशांमध्ये संरक्षणविषयक महत्त्वाचे करार होणार असल्याची दाट शक्यता आहे.

चीनच्या राष्ट्रपतीपदाची सूत्रे सांभाळल्यानंतर शी जिनपिंग यांचा हा पाकिस्तानचा दुसरा दौरा आहे. याआधी त्यांनी २०१५ मध्ये इस्लामाबादचा दौरा केला होता. जिनपिंग यांचा पाकिस्तान दौरा याआधी जूनमध्ये होणार होता. मात्र, करोना महासाथीच्या आजाराच्या पार्श्वभूमीवर हा दौरा रद्द करण्यात आला. तर, २०२० मध्ये आता चीनच्या राष्ट्रपतींचा हा दुसरा परदेश दौरा असणार आहे. याआधी त्यांनी जानेवारीत म्यानमारचा दौरा केला होता.

चीनच्या माध्यमांनी दिलेल्या वृत्तानुसार, जिनपिंग यांच्या पाकिस्तान दौऱ्याबाबत अद्यापही तारखा जाहीर झाल्या नाहीत. या दौऱ्याला ऐतिहासिक करण्यासाठी पाकिस्तान आणि चिनी अधिकाऱ्यांचे प्रयत्न सुरू असून सातत्याने बैठकांचे आयोजन केले जात आहे. जिनपिंग यांनी २०१५ मध्ये पाकिस्तानचा दौरा केला होता. त्यावेळी चीन-पाकिस्तान इकॉनॉमिक कॉरिडोरच्या अनुषंगाने ५१ करारावर स्वाक्षरी करण्यात आली होती.

दक्षिण आशियात चीनचा वाढता प्रभाव आणि भारतासोबत तणावपूर्ण असलेल्या संबंधाच्या पार्श्वभूमीवर जिनपिंग यांच्या या पाकिस्तान दौऱ्याला महत्त्व असणार आहे. चीनने फक्त लडाख, अक्साई चीन भागातील प्रत्यक्ष नियंत्रण रेषेजवळ सैन्याची जमवाजमव सुरू केली नसून पाकव्याप्त काश्मीरमध्येही अनेक प्रकल्पाच्या नावाखाली आपल्या सैन्याची जमवाजमव सुरू केली आहे. त्याशिवाय पाकिस्तानला चीन आणखी मदत जाहीर करण्याची शक्यता आहे.

दरम्यान, सौदी अरेबियासोबत संबंध बिघडल्यानंतर पाकिस्तानला चीनकडून मोठ्या अपेक्षा आहेत. आर्थिक कर्जाच्या ओझ्याखाली अडकलेल्या पाकिस्तानला आता सौदी अरेबियाने झटका दिला आहे. पाकिस्तानने २०१८ मध्ये सौदी अरेबियाकडून ६.२ अब्ज डॉलरचे कर्ज घेतले होते. यामध्ये पाकिस्तानला ३.२ अब्ज डॉलरचे कच्चे तेल उधार देण्यात आले होते. आता या कराराची वेळ मर्यादा संपली असून त्याचे नुतनीकरण झाले नाही. पाकिस्तान समोरील आर्थिक संकट अधिकच गडद होत असताना ही समस्या निर्माण झाली आहे. जागतिक नाणेनिधीनेदेखील मागील पाच महिन्यात तांत्रिकदृष्ट्या आर्थिक मदत रोखली आहे. सौदी अरेबियाला कर्ज देणे आणि तेलाबाबतच्या कराराची मुदत संपुष्टात आल्यामुळे पाकिस्तानच्या सेंट्रल बँकेची स्थिती आणखी चिंताजनक होण्याची भीती व्यक्त केली जात आहे.

Recent Posts