loader
Foto

Tiktok ban 'टिकटॉक बंदीचा इशारा म्हणजे दिवसाढवळ्या दरोडा'

बीजिंग: आक्रमक विस्तारवादाच्या धोरणांमुळे भारतासह, अमेरिकेसोबत चीनचे संबंध तणावाचे झाले आहेत. चीनच्या आगळकीला उत्तर देण्यासाठी भारताने चिनी कंपन्यांच्या अॅप्सवर बंदी आणली. भारताच्या पावलावर पाऊल टाकत अमेरिकेनेही चिनी कंपनीचे अॅप असलेल्या टिकटॉकवर बंदी आणण्यासाठी प्रयत्न सुरू केले आहेत. मात्र, टिकटॉकवर बंदीचा इशारा म्हणजे दिवसाढवळ्या दरोडा टाकण्यासारखे असल्याची टीका चीनने केली आहे.

चीनच्या परराष्ट्र मंत्रालयाच्या प्रवक्त्या हुआ चुनयिंग यांनी अमेरिकेच्या टिकटॉक बंदीबाबत भाष्य केले. अमेरिकेने टिकटॉक अॅप अमेरिकन कंपनीला विकण्यास सांगितले असून तसे न केल्यास अमेरिकेत कायमस्वरूपी बंदी आणण्यात येणार असल्याचे सांगितले आहे. अमेरिकेचे राष्ट्राध्यक्ष डोनाल्ड ट्रम्प यांनी त्याबाबतच्या आदेशावर स्वाक्षरीही केली आहे. हुआ चुनयिंग यांनी सांगितले की, कोणत्याही ठोस पुराव्याशिवाय अमेरिका टिकटॉकला दोषी ठरवत असून ४५ दिवसांच्या आत अमेरिकन कंपनीला अॅप विकण्यास सांगत आहे. अमेरिकेने उचलले पाऊल हे अपमानजनक आहे. अमेरिकेच्या अशाच खोट्या प्रचाराचा फटका हुवैई कंपनीला बसला असल्याचे त्यांनी सांगितले. अमेरिकेने टिकटॉक कंपनीवर बंदीची धमकी देणे हे एखाद्या गँगस्टरच्या तर्कासारखे असून दिवसाढवळ्या दरोडा टाकण्याचा प्रकार असल्याचे त्यांनी सांगितले.

अमेरिकन काँग्रेसच्या २५ सदस्यीय एका टीमने राष्ट्रपती ट्रम्प यांना अमेरिकन नागरिकांच्या डेटा सुरक्षितेबाबत पावले उचलण्याचा आग्रह केला होता. टिकटॉकच्या डेटामुळे चीनचा कम्युनिस्ट पक्ष आणि सरकार अधिक सक्षम होत असल्याचा दावा त्यांनी केला. अमेरिकेचे राष्ट्राध्यक्ष डोनाल्ड ट्रम्प यांनी टिकटॉक आणि वीचॅट या दोन अॅपवर बंदी आणण्याच्या आदेशावर मागील आठवड्यात स्वाक्षरी केली आहे. या आदेशानुसार आता या दोन्ही कंपन्यांना कोणताही आर्थिक व्यवहार करता येणार नाही.

ट्रम्प यांनी याआधी अमेरिकन कंपनीला टिकटॉक विकावे अथवा अमेरिकेतून गाशा गुंडाळा, असा इशारा बाइटडान्स या कंपनीला दिला होता. त्यासाठी १५ सप्टेंबरपर्यंतची मुदत दिली होती. टिकटॉकसारख्या 'अविश्वसनीय' अॅपने डेटा, माहिती जमा करणे हे राष्ट्रीय सुरक्षतेसाठी धोका आहे. या माहितीच्या आधारे चीनच्या सत्ताधारी कम्युनिस्ट पक्षाकडे अमेरिकन नागरिकांची खासगी माहिती जात असल्याचे ट्रम्प यांनी म्हटले. चीनकडून या खासगी माहितीचा दुरुपयोग होण्याची अधिक भीती असून कॉर्पोरेट हेरगिरी होण्याचा धोका संभावत असल्याचा दावा ट्रम्प यांनी केला होता

Recent Posts