loader
Foto

'अमेरिकेचे राष्ट्राध्यक्ष असलात तरी बलात्कार प्रकरणाची चौकशी होणार'

वॉशिंग्टन: अमेरिकेचे राष्ट्राध्यक्ष असलात तरी चौकशी करण्यात येणार असल्याचे न्यूयॉर्क कोर्टाने स्पष्ट केले आहे. डोनाल्ड ट्रम्प यांच्यावर एका महिलेने बलात्काराचा आरोप केला आहे. कायद्यातील पळवाट शोधून ट्रम्प हे चौकशीापासून स्वत:चा बचाव करत असल्याचा आरोप करण्यात येत आहे.

डोनाल्ड ट्रम्प हे राष्ट्राध्यक्षपदावर आहेत. त्यामुळे त्यांच्यावर राज्य न्यायलयात खटला चालू शकत नाही. मात्र, कोर्टाने हा दावा फेटाळून लावला. मॅनहॅट्टनच्या न्या. वर्ना साँडर्स यांनी म्हटले की, राष्ट्राध्यक्षपदावर असल्यामुळे त्यांना या प्रकरणातून सवलत देता येणार नाही. साँडर्स यांनी म्हटले की, या निर्णयानंतरही ई जी कॅरोल यांना आपला खटला सुरू ठेवण्याची परवानगी मिळाली आहे. कॅरोल यांच्याकडून ट्रम्प यांच्या डीएनए चाचणीची मागणी करण्यात येत आहे. डोनाल्ड ट्रम्प यांनी १९९० च्या दशकात बलात्कार केल्याचा आरोप आहे. बलात्काराचा आरोप मागे घेण्यासाठी त्यांच्यावर दबावही टाकण्यात आला होता. त्यासाठी त्यांची मानहानीही करण्यात आले असल्याचा आरोप ट्रम्प यांच्यावर करण्यात आला आहे. पीडितेचे वकील रोबर्टा कपलान यांनी सांगितले की, डोनाल्ड ट्रम्प यांनी ई जीन कॅरोल यांची बदनामी केली असल्याचेही सिद्ध करण्यास तयार आहोत. कोर्टाच्या निर्णयाबाबत ट्रम्प यांच्या वकिलांनाही माहिती देण्यात आली आहे.

प्रकरण काय आहे?
अमेरिकेचे राष्ट्राध्यक्ष डोनाल्ड ट्रम्प यांनी लैंगिक शोषण केल्याचा आरोप न्यूयॉर्कमधील लेखिकेने केला होता. दोन दशकापूर्वी ट्रम्प यांनी बलात्कार केल्याचा आरोप या महिलेने केला आहे. महिलेचा आरोप फेटाळून लावत ही फेक न्यूज असल्याचे डोनाल्ड ट्रम्प म्हणाले.

न्यूयॉर्कमधील ई. जीन कॅरोल (वय ७५) यांच्या 'व्हॉट डू वूई नीड मेन फॉर?, या पुस्तकात त्यांनी हा आरोप केला आहे. ट्रम्प यांनी १९९० च्या दशकात न्यूयॉर्क सिटीच्या एका डिपार्टमेंट स्टोरच्या ड्रेसिंग रुममध्ये आपल्यावर लैंगिक अत्याचार केला होता, असे या पुस्तकात म्हटले आहे. या पुस्तकातील महत्त्वाचे अपडेट्स न्यूयॉर्क मॅग्झीनच्या वेबसाइटवर प्रकाशित करण्यात आले आहेत. ट्रम्प यांच्यासह अनेक पुरुषांनी आपले लैंगिक शोषण केल्याचा दावा सुद्धा कॅरोल यांनी या पुस्तकात केला आहे. डिपार्टमेंटच्या स्टोरमध्ये रियल इस्टेट मुगल ट्रम्प यांना भेटले त्यावेळी मला पाहून हिंसक झालेल्या ट्रम्प यांनी ड्रेसिंग रुममध्ये माझ्यावर बलात्कार केला, असे या महिलेने पुस्तकात म्हटले आहे.

ट्रम्प यांच्यावर सार्वजनिकरित्या लैंगिक शोषणाचा आरोप करणाऱ्या १६ महिलांच्या यादीत कॅरोल यांचा समावेश आहे. यातील बहुतांश महिलांनी २०१६ च्या राष्ट्राध्यक्षपदाच्या निवडणुकीच्या काही आठवड्या आधी डोनाल्ड ट्रम्प यांच्यावर लैंगिक शोषण केल्याचा आरोप केला होता.

Recent Posts