loader
Foto

China चीनचे विस्तारवादी धोरण सुरूच; 'या' देशाच्या भूभागावर केला दावा

बीजिंग: लडाख आणि दक्षिण चीन समुद्रात आपली आक्रमक विस्तारवादी भूमिका घेणाऱ्या चीनने आता आणखी एका देशाच्या भूभागावर दावा ठोकला आहे. चीनने आता मध्य आशियातही विस्तारवादी भूमिका घेतली असून ताजिकिस्तानमधील पामीरच्या डोंगरांवर आपला दावा सांगण्यास सुरुवात केली आहे. त्यामुळे आता मध्य आशियातील गरीब देशांमध्ये चिंतेचे वातावरण वाढले आहे. चीन आणि ताजिकिस्तानमध्ये २०१० मध्ये एक करार झाला होता. त्यावेळी ताजिकिस्तानला पामीरमधील ११५८ किमीचा भाग चीनला द्यावा लागला होता.

चिनी इतिहासकार याओ लू ने यांनी चीनच्या सूत्रांच्या हवाल्याने दावा केली की, पूर्ण पामीरचा भाग चीनचा आहे आणि चीनला हा संपूर्ण भूभाग आपल्या ताब्यात घ्यायला हवा. चीनच्या सरकारी वृत्तमाध्यमांत हा लेख छापून आल्यानंतर ताजिकिस्तानच्या अधिकाऱ्यांनी चिंता व्यक्त केली आहे. चीनच्या दाव्यानंतर आता रशियाही अधिक सतर्क झाला आहे. रशियाच्या दृष्टीने मध्य आशियाचा भाग हा सामरीकदृष्ट्या महत्त्वाचा आहे.चीन ताजिकिस्तान-अफगाणिस्तान सीमेवर ताशकुर्गानजवळ एक विमानतळ उभारत आहे. त्यामुळे अधिकच चिंता व्यक्त केली जात आहे. चिनी इतिहासकारांनी आता चीनने आपला भूभाग पुन्हा ताब्यात घेण्याचे आवाहन सरकारला केले आहे. काही जमीन आपल्याला पुन्हा मिळाली असून काही अद्यापही शेजारच्या देशांकडे आहे. त्यामध्ये पामीरचाही प्राचीन भाग असून मागील १२८ वर्षांपासून जागतिक दबावामुळे चीनपासून वेगळा असल्याचेही चिनी अभ्यासकांनी म्हटले आहे.

चीन आणि ताजिकिस्तान सरकारमध्ये सोन्याच्या खाणीबाबत चर्चा सुरू असल्याचे समजते. चीनमधील वृत्तानुसार, ताजिकिस्तानमध्ये १४५ सोन्याच्या खाणी आहेत. ताजिकिस्तानच्या सरकारने चिनी कंपन्यांना या खाणींमध्ये उत्खन्न करण्याची परवानगी दिली आहे. चीनच्या या हालचालींवर ताजिकिस्तान व इतर देशांचे लक्ष आहे. शेजारच्या देशातील भूभागावर दावा ठोकण्यासाठी चीनकडून त्या भागाजवळ विमानतळ, रस्ते बांधणी करण्यात येते. आता ताजिकिस्तानच्या बाबतही चीनने हेच केले असल्याचे एका अधिकाऱ्याने सांगितले.

दरम्यान, भारत, जपान आणि अमेरिकेसोबत तणावाचे संबंध असताना आता चीनने या तणावात आणखीच भर टाकली आहे. चीनने दोन अणवस्त्रवाहू क्षेपणास्त्रांची चाचणी केली असल्याचे वृत्त समोर आले आहे. चीनच्या पीपल्स लिबरेशन आर्मीच्या रॉकेट फोर्सने नुकत्याच झालेल्या युद्ध सरावा दरम्यान डीएफ-२६ आणि डीएफ-१६ क्षेपणास्त्रांची चाचणी केली असल्याची माहिती आहे.

Recent Posts