loader
Foto

करोनावर व्हिडिओ पोस्ट; फेसबुक, ट्विटरकडून ट्रम्प यांच्यावर कारवाई

वॉशिंग्टन: अमेरिकेचे राष्ट्राध्यक्ष डोनाल्ड ट्रम्प पु्न्हा एकदा फेसबुक आणि ट्विटरच्या निशाण्यावर आले आहेत. या दोन्ही सोशल मीडिया प्लॅटफॉर्मवरून डोनाल्ड ट्रम्प यांनी केलेल्या पोस्ट डिलीट करण्यात आल्या आहेत. करोना व्हायरसचा परिणाम लहान मुलांवर होत नसल्याचा दावा केला होता.

फेसबुककडून पहिल्यांदाच डोनाल्ड ट्रम्प यांच्या करोनाबाबतच्या पोस्टवर कारवाई करण्यात आली. ट्रम्प यांनी पोस्ट केलेला व्हिडिओ खोटे दावे करत असून त्यामध्ये कोणत्याही प्रकारचे तथ्य नाही. कोणत्याही व्यक्तीमध्ये करोनाशी पूर्णपणे लढण्याची क्षमता विकसित झाली नाही. त्यामुळे हा व्हिडिओ आमच्या नियमांविरोधात असल्यामुळे व्हिडिओ हटवला असल्याची माहिती फेसबुकच्या प्रवक्त्यांनी दिली. फेसबुकनंतर सायंकाळी ट्विटरने ट्रम्प यांचा व्हिडिओ हटवला.

बुधवारी सकाळी फॉक्स अॅण्ड फ्रेंड्सना दिलेल्या मुलाखतीत ट्रम्प यांनी म्हटले की, आता सगळ्याच शाळा पुन्हा सुरू करण्याची वेळ आली आहे. लहान मुलांमध्ये करोनाच्या संसर्गासोबत लढण्याची क्षमता असल्याचे त्यांनी म्हटले. जागतिक आरोग्य संघटना अथवा अमेरिकेकडूनही याबाबतही काही निर्देश जारी करण्यात आलेल्या नाहीत.

 

याआधीही डोनाल्ड ट्रम्प यांच्या दोन ट्विटसना दिशाभूल करणारे ट्विटस असे संबोधण्यात आले होते. त्याशिवाय या ट्विटससोबत ट्विटरने 'फॅक्ट चेक'चा इशारा दिला होता. ट्विटरने ही कारवाई केल्यानंतर ट्रम्प भडकले होते. त्यानंतर ट्विटरने केलेली सत्य पडताळणी खोटी असल्याचे त्यांनी म्हटले होते. त्याशिवाय ट्रम्प यांनी ट्विटर अमेरिकन राष्ट्राध्यक्षपदाच्या निवडणुकीत दखल देत असल्याचा आरोप केला होता.

दरम्यान, याआधीही ट्रम्प यांच्या मुलाच्या ट्विटवर ट्विटरने कारवाई केली होती. अमेरिकेचे राष्ट्राध्यक्ष डोनाल्ड ट्रम्प सातत्याने करोनाच्या आजारावर हायड्रोक्सीक्लोरोक्विन औषध प्रभावी असल्याचा दावा करतात. डोनाल्ड ट्रम्प यांच्या मुलानेही हायड्रोक्सीक्लोरोक्विन औषध प्रभावी असल्याचे ट्विट केल्यानंतर ट्विटरने कारवाई केली होती. ट्रम्प ज्युनिअर यांनी ट्विट केलेला व्हिडिओ हा कोविड-१९ बाबत चुकीची माहिती देण्याबाबतच्या नियमांचे उल्लंघन केले असल्याचे ट्विटरने म्हटले होते. ट्रम्प यांच्यासह काहीजणांनी हायड्रोक्सीक्लोरोक्विन हे मलेरियावरील औषध करोनावर प्रभावी असल्याचा दावा केला होता. मात्र, अद्यापही वैद्यकीय चाचण्यांमध्ये या दाव्याला पुष्टी मिळाली नाही.

Recent Posts