loader
Foto

बॉलिवूड-ड्रग्ज नेक्सस; गृहमंत्रालयाची बॉलिवूडला क्लीनचिट

अभिनेता सुशांतसिंह राजपूत मृत्युप्रकरणानंतर सीबीआय, तसेच नार्कोटिक्स कंट्रोल ब्युरोचा (एनसीबी) तपास चित्रपटसृष्टीच्या अमली पदार्थ तस्करांशी जोडला जात असतानाच, केंद्र सरकारने मंगळवारी लोकसभेत याबाबतचे कोणतेही धागेदोरे हाती आले नसल्याचे स्पष्ट केले आहे. 'अमली पदार्थाच्या तस्करांशी संबंध असल्याप्रकरणी चित्रपटसृष्टीत काम करणाऱ्यांवर कारवाई करता येईल, अशी कोणतीही माहिती 'एनसीबी'ला लॉकडाउनच्या काळात मिळालेली नाही,' अशी माहिती केंद्रीय गृह मंत्रालयाने दिली आहे.

चित्रपटसृष्टीत काम करणारे व अमली पदार्थ तस्करांच्या संबंधांची सरकारने चौकशी केली काय, या प्रश्नावर केंद्रीय गृह राज्यमंत्री जी. किशन रेड्डी यांनी लेखी उत्तरात स्पष्टीकरण दिले आहे. 'गेले वर्षभर एनसीबीने सूत्रांकडून मिळालेल्या माहितीवरून अनेक ठिकाणी छापे घातले आहेत. काही ठिकाणी अमली पदार्थ हस्तगत केले आहेत. काही जणांना अटकही करण्यात आली आहे. याप्रकरणी तपासही सुरू आहे,' अशी माहिती केंद्र सरकारने दिली आहे. 'चित्रपटसृष्टी व अमली पदार्थांच्या तस्करांचे संबंध असल्याची कोणतीही माहिती लॉकडाउनकाळात एनसीबीकडे आली नाही,' असेही या उत्तरात स्पष्ट करण्यात आले आहे.

याच उत्तरात सुशांतसिंह प्रकरणानंतर चित्रपटसृष्टीतील काही जणांवर झालेल्या कारवाईबाबतही माहिती देण्यात आली आहे. '२८ ऑगस्ट रोजी एनसीबीच्या मुंबई विभागाकडे एक प्रकरण नोंद झाले आहे. याबाबत आत्तापर्यंत १० जणांना अटक झाली आहे. या वेळी झालेल्या कारवाईत त्यांच्याकडून गांजा, हशीश, टेट्रो हायड्रो कॅनाबिनॉल आणि लिसर्जिक अॅसिड डिथिलेमिड हे अमली पदार्थ जप्त करण्यात आले आहेत,' अशी माहितीही गृह मंत्रालयाने दिली आहे.

Recent Posts