loader
Foto

नागपूर जिल्ह्यातील करोनामुक्तांची संख्या १ लाखांवर

नागपूर: सप्टेंबरच्या अखेरपर्यंत शहरात थैमान घालत असलेला करोनाचा प्रादुर्भाव गेल्या काही दीड महिन्यांपासून आटोक्यात येऊ लागला आहे. मंगळवारी जिल्ह्यातील करोनामुक्तांची संख्या एक लाखावर गेली. दरम्यान, मंगळवारी शहर आणि जिल्ह्यात २६३ नव्या बाधितांची नोंद करण्यात आली, तर सहा रुग्णांना प्राण गमवावे लागलेत तसेच मंगळवारी दिवसभरात २११ रुग्ण करोनामुक्त झालेत.

ऑक्टोबरच्या सुरुवातीपासून करोनाबाधितांच्या मृत्युदरात हळूहळू घसरण होऊ लागली. मंगळवारी शहरातील दोन, ग्रामीण भागातील तीन आणि जिल्ह्याबाहेर एक अशा एकूण सहा रुग्णांचा मृत्यू झाला. गेल्या काही दिवसात मृत्युसंख्या एक आकडी असल्याने करोनाच्या मृत्युदरावर नियंत्रण येत असल्याचे संकेत मिळू लागले आहेत. तरीही दिवाळीनंतर रुग्णसंख्येत वाढ होण्याची भीती व्यक्त केली जात आहे. राज्यात जानेवारी आणि फेब्रुवारीदरम्यान करोनाची दुसरी लाट अपेक्षित आहे. आजवर शहरातील २,४८०, ग्रामीण भागातील ५९७ आणि जिल्ह्याबाहेरील ४५४ रुग्णांना असे एकूण ३५३१ नागरिकांना करोनामुळे आपले प्राण गमवावे लागलेत. दरम्यान, मंगळवारी शहरात २१८, ग्रामीण भागात ४४ आणि जिल्ह्याबाहेरील एक, अशा एकूण २६३ नव्या बाधितांची भर पडली. आतापर्यंत नागपुरात एकूण १ लाख ६ हजार ८२४ रुग्णांची नोंद करण्यात आली. गेल्या २४ तासांत जिल्ह्यातील एकूण २११ व्यक्ती करोनामुक्त झाल्यात. त्यामुळे जिल्ह्यातील एकूण करोनामुक्तांची संख्या ही १लाख १९९ वर पोहोचली आहे. याखेरीज सध्या जिल्ह्यात एकूण ३ हजार ९३ सक्रिय करोनाबाधित आहेत.

जिल्ह्याची स्थिती

एकूण बाधित : १,०६,८२४

एकूण करोनामुक्त: १,००,१९९

एकूण मृत्यू : ३,५३१

मंगळवारचे बाधित : २६३

मंगळवारचे मृत्यू : ६

सक्रिय बाधित : ३,०९३

Recent Posts